Ripublicanlu Donald Trump s-turnă la Casa Albâ
Ripublicanlu Donald Trump, 47-lu prezidentu a Statilor Uniti ali Americâ, s-turnă la Casa Albâ ti doilu mandat.
Tașcu Lala, 22.01.2025, 19:35
Ripublicanlu Donald Trump (78 di añi) pritu giurâmintul ufițialu ș-ahurhi doilu mandat ti prezidentu a Statilor Uniti ali Americâ (SUA), dupâ patru añi tu cari America fu cumândârsitâ di Joe Biden.
Donald Trump: „Giuru că va s-umplu cu pisti thesea di prezidentu a Statilor Uniti ș-că va s-țânu, va s-aveglliu ș-va s-apăru Constituția a Statilor Uniti, ahâtu câtu va s-potu”.
Di itia a țicnâllei, țeremonia pritu cari lo thesea aesta s-feați tu Rotonda a Capitolului ditu Washington, iara nu pi scărli a Congreslui, ș-aestu lucru s-fați ti prota oarâ tu patru dețenii.
Donald Trump va lu-aibâ vițeprezidentu JD Vance.
Prezidentul ali SUA ș-lo borgea că va s-simneadzâ, nica ditu protili sâhăț la Casa Albâ, aproapea 100 di ași-spusi cumandi executivi pi temi di la sigurlâchea a sinurloru pânâ di adrarea a naftâllei ş-a gaziloru, ș-ma multu pi avinarea a imigranțâloru ți ședu contra a nomlui ică pi adrarea a unui scut antirachetâ ți s-afireascâ Statili Uniti.
Tu ți mutreaști icunumia, Donald Trump dzâsi că alidzearea a lui diznău lâ deadi optimismu a investitoriloru.
Donald Trump: Videț chiola rezultati la cari nu s-aștipta canâ ș-tutâ duñeaua dzâți că easti efectul Trump. Di anda fui aleptu, pâzarea di tranzacționari criscu para multu, iara optimismul a ñițloru pârmâtefțâ agiumsi pi unâ scarâ recordu tu aeșțâ 39 di añi di ma nâpoi.
Pârălu Bitcoin aspusi ș-elu recordu dupâ recordu, anda mărili companii di investiții deadirâ tu șteari emburlâchi di dzăț di miliardi di dolari, investiții ți s-facu di sibepea că amintai alidzerili ș-aesti emburlâchi va s-adarâ locuri di lucru ti suti di ñilli ică miliuni di americañi.
Uidisitu cu adetea americanâ, prezidentul lo parti la dyeavasea privatâ la bâsearica St John ditu Washington DC, ninti ta ș-aspunâ giurâmintul.
Autor: Mariana Chiriță
Apriduțearea: Mirela Biolan
