România după moţiunea di cenzură
Corina Cristea, 15.06.2015, 12:31
Previzibil, votlu secret cu topchi exercitat tru bitisita a stămânal’ei ti tricu tru legislativlu di Bucureşti alu tanu tu ipotisi Executivlu Victor Ponta, cari s-ampulisi cu treia moţiuni di cenzură. Opoziţia scoasi tru videala că nu ari majoritate parlamentară, iara guvernul lipseasti să-şi duca ma largu lucarlu, declara premierlu ti scurtu chiro după votlu mutrindalui moţiunea cu numa Victor Ponta – demis tra exces di puteari prit ambudyiusearea a alidzerlor. Ndreptul la vot nu easti una lozincă!”, iniţiată di PNL. Primlu-ministru adusi aminti că tru Parlamentu lucarlu ari ahurhita ma ninti ti proiectili di nom mutrindalui alidzerli legislativi şi votlu prit corespondenţă şi spusi nica na oara că s-fati pismani că, tru brumar, la secţiili di vot dit xinatati, nu tuţ român’il’i putură s-voteadza tru condiţii tin’isiti.
Ia ti spusi premierlu Victor Ponta:
Pistipsescu că lucarlu gol s-di simasie tora, tra yinitor, easti s-asigurpsim condiţiili ca iti yinitoari alidzeri să s-tăna tru condiţii tin’isiti. U spusim ş-napoi u spunem, ma largu şi minduim că easti atea nai cama bună ceareie ca alidzerli pisti tut, şi nafoara a vasiliil’ei, s-hibă organizati di cătra autoritatea electorală permanentă, ahtari turlie câ s-nu mata aiba niachicăseri polititi pi aestă temă.”
Liberal’i spun că rezultatlu a votlui dit parlamentu easti una ixichi di tin’ie andicra di cetăţeni şi dimănda ca va s-dipuna una nauă moţiuni di cenzură tra sesiunea ti di toamnă. El’i caftara diznau, demisia a premierlui ti furn’ia câ, spun el’i, ti legitimitatea a aistui ari subei.
Ia ti spusi si coprezidentul a PNL, Alina Gorghhiu:
Numata ari legitimitati naţională tra atea ca-l’i ntapa nascanta român’i contara a alantor român’i şi, ti amărtie tra noi tuţ, numata ari legitimitati morală ti atea ca fu bagat pi ipotisi di una altă majoritati andicra di aesta di tora. Nu pistipseam varnaoara, că un om tinir va s-agiungă s-curmă ndreptul di vot a român’ilor.”
Problemili a premierlui social-democrat nu s-bitisira ama unăoară cu votlu dit Parlamentu. Contra a lui, ma largu s-duti ninti pusputearea penală tru un dosar tra cari easti stipsit di falsu tru angrapseri sum vula privată, complicitati la evaziuni fiscală tru turlie continuată şi larea păradzlor, lucri ti cari s-lugurseasti ca s-au fapta tru chirolu candu eara avocat. Ma multu, vitepremierlu şi liderlu a UNPR, Gabriel Oprea, fati timbihi că partidlu ti lu cumanduseasti poati s-iasa di la guvernari. Declaraţiili a lui, fapti tru arada a unei emisiuni televizata, yin tru contextul tru cari Parlamentul ari tru arada di lucru, să zburasca, aestă stămână ti 22 di iniţiative di alaxeri a Codurlor Penal şi di Procedură Penală. Proiectili acata tru isapi priopuniri controversati, cum suntu ateali mutrindalui arestarea preventivă pi thimel’ilu a nascantor spuneri ngrapsiti, ntimil’eati, nu rezonabili cum eara până tora, ama şi eliminarea a cătuşilor tra arestaţl’ii preventiv, cari nu featira lucri cu priscavil’e. Gabriel Oprea spuni că UNPR andrupasti anvartusearea ali justiţie şi a statlui român şi nu poati s-hiba simfun cu niti una minduita ti aspardzearea a aistor doi sturi ali democraţie.
Angrapsearea: Corina Cristea
Armanipserea: Tascu Lala
