România nâstreaţi 1000 di morțâ
Daniela Budu, 13.05.2020, 21:03
Numirlu a aţiloru cari murirâ tru România di itia-a infecțiillei cu năulu coronavirus nâstricu praglu di unâ ňille. Uidisitu cu hâbarea-a Gruplui di Comunicari Strateghică, cari da tru şteari cathi dzuuâ ţifrili ufiţiali dimândati di autorităț, di cându işi tu migdani protlu caz di coronavirus tru România, tu inşita-a meslui şcurtu, lândzâdzârâ anvârliga di 16.000 di oamiňi tru vâsilie. Hâbarea bună easti că aproapea giumitati ditu aeşţâ s’vindicarâ pânâ tora. Cama di dauâ stâmâňi, cazurli activi di coronavirus ditu România armasirâ anvârliga di 7.300-7.500. Nica ş-ma multu, media-a aţiloru vindicaț ahurhi să s’aproaki icâ sâ-lu nâstreacâ tu nâscânti dzâli numirlu a cazurloru năi dimândati cathi dzuuâ. Alliumtrea, numirlu a aţiloru lândzidz di COVID-19 și internaț tru secțiile di tearapie intensivă armasi idyiulu tru aestu kiro, anvârliga di 250 di cazuri tru cathi dzuuâ.
Până tu aestã oarâ, pi livelu național, eara prilucrati aproapea 270 di ňilli di testi. Uidisitu cu isăkili, România easti cratlu ditu Evropa Tsentralâ şi ditu Apiritâ cu nai cama marli numiru di morţâ ditu reghiuni. Tru ţi mutreaşti catandisea-a cetățeaňilor româňi ţi suntu tru alti stati, uidisitu cu hâbărli loati di misiuňili diplomatiţi și ofiţiili consulari ali Românie tru xinâtati, aproapea trei ňilli di cetățeaňi româňi eara spuşi ca hiindalui infectaț cu năulu coronavirus. Cama di giumitati ditu aeşţâ suntu tru Italia, ama ari multi cazuri și tru Spania și Ghirmânie. Ditu ahurhita-a pandemiillei di COVID-19 cama di unâ sută di cetățeaňi româňi aflaț tru xiâtati murirâ, nai cama mulţâ tru Marea Britanie, Italia și Franța — nica dimândâ isăkili ufiţiali.
Nâscântâ di specialișţâ spunu că bărbațlli, mllerli și cilimeňilli lli-acaţâ idyealui, multu di multu, nica ş-tu numiru mari, infecţia cu năulu coronavirus, ama cripărli suntu di len turlii. Nai cama multu angreacâ ilikia, lângorli croniţi, ama și sexul. Uidisitu cu spusili a Organizațiillei Mondialâ a Sănătatillei, nai cama multu suntu agudiţ auşlli ţi tragu di lângori cardiovasculari, diabetu, hipertensiuni, lângori a sistemlui adilleaticu și harkinu. Lângoarea a pulmuňiloru di itia-a năului coronavirus feaţi ma multi victimi tru arada-a bărbațlor — nica u spuni tu isapea-a llei OMS.
Tu ţi mutreaşti cilimeaňilli, aeșţă nu s’arâdâpsescu anamisa di, pareili ţi lişoru pot s’hibâ aguditi, dinintea-a coronaviruslui. Nica sâ spunemu că, după doi meşi di catandisi di ananghi, tru România yinu 30 di dzâli di catandisi di ascumbuseari/ alertă, cari nsimneadzâ hâbinisearea-a sertiloru restricții, ama și năi borgi. Autorităţli dimândâ că easti ananghi ş’ma largu di meatri trã alumtaticu ta s-nu s’arâspândeascâ viruslu, acşi, di viniri, easti apufusitâ purtarea a prusupidâllei/ a mascâllei tru locârli publiţi icâ tu urdinarea cu transportulu n’comun. Româňilli va s’poatâ s’iasâ din casă fãrã declaraţia pi a lui giueapi, ama nu va s’poatâ s’iasâ ditu câsâbă fãrã aestâ.
Ngrâpsearea: Daniela Budu
Armânipsearea: Taşcu Lala
