România şi arâhatea tu Orientul di Mesi

România Internațional, 22.01.2014, 12:06

Tuti pisti tuti, la n’ii di kilometri di marli conflictu, român’ii avurâ totna un gaile ayoriea andicra di catandisea dit Orientul di Mesi. Sensibilitatea di turlii religioasâ a unui popul magioritar ortodox dusi la un mari interes mutrinda tuti angrâpserli ţi mutrescu Vâsâlia Simtâ. Sutili di n’ii di cetăţen’i israelien’i dit Românii suntu nai mai buna apunti dintrâ dauli vâsâlii. Iara n’iili di tiniri araghi, prit cari mulţâ palestinien’i, ţi înviţarâ carti la falcultâţli dit România postbelicâ, criscurâ şi ei intereslu a multor român’i andicra di catandisea di aclo. La tuti aesti s-adâvgă opţiunea ofiţialâ dit 1967 a Bucureştiului, golu câsâbă di dinâpoia a Cortinâl’ei di Hier cari, contra a ţi avea câftatâ Moscova, nu arupsi ligâturli diplomatiţi cu Israelu.

Dincolo di fala a dictatorlui comunistu Nicolae Ceauşescu, aţel cari, cându-şi chinuia poplu a lui, vrea s-agiutâ la ligâtura a israelien’ilor cu palestinen’i câ ţe aştipta un premiu Nobel ti Arâhati, s-veadi ghini că România fu totna un pion ti daoli părţâ. Tu idyul chiro, dupu căderea al Ceauşescu, tuţ prezidenţâl’ii român’i vrurâ s-agiutâ, tu ţi mutreaşti arâhatea tu Orientu, la greulu cu cari s-alumtâ tutâ comunitatea internaţionalâ — ei dusirâ şi aclo di s-adunarâ cu liderl’ii di Tel Aviv şi di Ramallah. Stâmâna aestâ, prezidentul Traian Băsescu lâ dzâsi, şi a omologlui israelian Shimon Peres, ama şi a liderlui palestinian Mahmud Abbas, că România andrupaşti întreaga alumtâ ti arâhati a secretarlui di stat John Kerry.

Caplu ali diplomaţii americanâ, ţi poartâ un polim tu ţi mutreaşti conflictili dit dauli pârţâ, zburâ nica unâ oarâ, tora ayoniea, cu liderl’ii israelien’i şi palestinien’i mutrinda un nău proiectu di achicâseari mutrinda sinurli, sicuritatea, statutlu a Ierusalimlui şi ursita a refugiaţlor palestinien’i. Băsescu dzâsi iara că arâhatea nu s-poati fârâ ca a Israelui sâ-i hibâ asigurpsitâ sicuritatea, ama şi că palestinien’ii au îndreptu s-aibâ vâsâlia a lor. Pistipsescu că easti minduita a tutulor aţei cari u vor aestâ reghiuni, că niţi unâ dit aesti problemi nu poati s-hibâ andreaptâ fărâ un compromis cari s-aibâ maşi un scupo – dauâ vâsâlii tu arâhati, fârâ gaildeadz.. Scupolu a pâzâripserilor” palestiniano-israelieni mutreaşti s-aducâ arâhatea, nu s-aspunâ averlu isturic” – bitisi prezidentul ali Românii. El pricunuscu, tu idyul chiro, că aşteaptâ dânâsearea a mouabeţlor ti arâhati câ ţe şi tu Israel şi tu locurli palestinieni, bâneadzâ baia cetăţen’i român’i, ti cari Bucureştiul lipseaşti s-hibâ angâtan.