România şi catandisea a refugiaţlor
Proţl’ii refugiaţi di arâzgâ sirianâ agiumţâ tu Români furâ apruchiaţ di Ţentrul Regional di Cazari şi Proţeduri ti Solicitanţâl’ii di Azil dit Vestul ali vâsâlii, di Timişoara.
Corina Cristea, 06.10.2015, 10:54
Proţl’ii refugiaţi di arâzgâ sirianâ agiumţâ tu Români furâ apruchiaţ di Ţentrul Regional di Cazari şi Proţeduri ti Solicitanţâl’ii di Azil dit Vestul ali vâsâlii, di Timişoara.
Easti zborlu di patru cetăţen’i ţi imnau paranom, fârâ acti şi cari, dupu ţi furâ aflaţ t-unâ garâ, dzâsirâ că vreau s-agiungâ tu Ghermănii şi câftarâ azil tu Românii. Datili spun că, tora, nu ari niţi turlii di presiuni ayoriea mutrinda migraţia tu Românii — estan furâ înregistrati 944 di câftări di azil, andicra di 900 tu anlu 2014.
Guvernul di Bucureşti bâgă tu practico, ama, nâscânti meatri şi operaţionaliză dauâ taberi tu Vestu – cathiunâ poati s-ţânâ 500 di oamin’i.
Dinclo di meatrili ayunisiti, caplu a executivlui, Victor Ponta, dzâsi, ama, că întreaga catandisi nu ari hâiri ici tu ţi mutreaşti putearea di integrari a persoanilor refugiati: Aoa zburăscu prota ti scutearea a actilor ţi lâ lipsescu, di acceslu la serviţiili di sânâtate, maxus cându easti zborlu di ficiuriţ, di oamin’i cama tu ilichii, di acceslu la praxi ti ficiuriţii cu aestu statut, ama zburăescu ş-ti acceslu la locurli di lucru. România nu avu niţi vârâ ahtari experienţâ pânâ tora şi minduiescu că easti borgea a noastâ s-achicâsim ci ţi easti aestu fenomen la nivel european, s-him ietimi ti iţi vârâ catandisi şi s-avem andreapti mecanismili cari s-agiutâ nu maşi la prevenţii, ama ş-la integrari.
Uidisit cu planlu ali Comisii Europeanâ di ampârţari a 120 di n’ii di migranţâ tu aţeali 28 vâsâlii membri ali Uniuni Europeanâ, România lipseaşti s-aproachi 2475 di refugiaţ, ayoriea di aţei 1785 pi cari Bucureştiul îi avea hâbârisitâ că poati s-îi ţânâ. Lipseaşti un efortu, un lucru deadun a tutulor autorităţlor şi a instituţiilor, maxus că România nica nu ari bâgati tu practico, tu nomlu naţional, borgili mutrinda agiutorlu a refugiaţlor, a ficiuriţlor şi a oamin’ilor şi au ananghi, dzâţi Victor Ponta.
Bucureştilu da maşi 3,6 lei (0.8 euro) pi dzuâ ti cathi refugiat cari agiundzi tu Românii, câ ţe aşi dzâţi un nom dit anlu 2006, ama aestu lucru lipseaşti alâxit, adâvgă premierlu.
Opoziţia, prit boaţea a deputatlui PNL, Ionuţ Stroe, şi-aspusi andruparea a meatrilor ţi lipsescu, ca România s-poatâ s-hibâ solidarâ tu Europa: Aveţ andruparea a Parlamentului, la nivel di declaraţii, ama lipsescu bâgati tu practico tuti zboarâli şi yiniţ aoa cu pripuneri legislativi cari s-adarâ mecanismili di integrari soţialâ, di asiguripseri di sânâtati şi di tuti aţeali ţi li adusit aminti. Ionuţ Stroe dzâsi, pi di altâ parti, că România easti unâ dit pţânili vâsâlii cari nica mai ari ambasadâ tu Siria, iar aestu lucru di mari simasii lipseaşti valorificat.
