România și criza ditu Orientul di Mesi
Autoritâţli româneșțâ suntu tu catastisi di alertâ di cara s-fați polim tu Orientul di Mesi.
Tașcu Lala, 30.03.2026, 09:25
„România easti tu sigurlâki şi nu easti fuvirsitâ ici directu. Ți cara că aestâ catastisea reghionalâ di sigurlâki ditu Orientul di Mesi s-asparsi para multu, vâsilia a noastâ nu easti tu piriclliu. Instituţiili a statlui românescu ți u au borgea ti politica di nafoarâ şi securitati mutrescu cu mengâ evoluţia a catastisillei ş-lleau tuti misurli di cari easti ananghi”, dzâsi prezidentul Nicuşor Dan. El cundille că tu prota thesi easti sigurlâkea a româñilor ți suntu tu zonili iu s-fați ceamauna și lâ feați tâmbihi s-armânâ isihi şi s-ascultâ urnimiili țâ lâ li da emu autorităţli locali, emu ațeali naţionali.
Tu arada a lui, premierlu Ilie Bolojan lâ dzâsi a româñilor ți suntu astâmâsiț tu Orientul di Mesi că lâ easti aproapi ș-lâ akicâseaști gailelu. Lucurlu di prota thesi a autorităţlor di Bucureşti easti sigurlâkea ti ițido țetăţean român, adâvgă el, dândalui asiguripseri că mutreaști cu angâtan evoluţia a catstisillei ditu zonâ, că easti tu ligâturâ cu elli și âlli si da dipriunâ hâbări di la Ministerlu di Nafoarâ, cata cumu şi di ambasadili şi consulatili ali Românie ditu reghiuni. Personalul diplomatic şi consular easti pi lucru şi easti etimu s-âlli agiutâ tuț ți suntu tu zori – dzâsi premierlu. Și el âlli urnipsi româñilli ți suntu tu Orientul di Mesi s-tiñiseascâ urnimiiili a autorităţlor locali, s-nu urdinâ maca nu easti musai ananghi şi s-da giuiapi dipriunâ la ambasadili i consulatili ali Românie ti loclu iu suntu, ta s-poatâ s-hibâ agiutaț. Nica ma multu, el lâ gri, luni, tu unâ şedinţâ a chivernisillei pi tema a catastisillei a țetăţeañilor româñi astâmâsiț tu zona di la mardzinea a Iranlui, di cara, ma ninti, şi ministerlu di Nafoarâ adră unâ celulâ di crizâ castine ti aestâ furnie, iu loarâ parti, online, și şefañllii a misiuñilor diplomatiți ali Românie ditu vâsiliili ditu reghiunea ți easti acâțatâ tu ceamaunâ. Premierlu dzâsi că autorităţli da s-hibâ dipriunâ tu ligâturâ cu româñilli astâmâsiț s-aflâ cearei ta sâ-lli aducâ acasâ unâ ș-unâ ți catastisea va lâ da izini.
Tu arada a lui, ministrul di Nafoarâ, Oana Ţoiu, lâ câftă a țetăţeañilor româñi ți suntu tu naia di ceamaunâ sâ-şi pitreacâ datili di contactu la ufițiili consulari ditu reghiuni. Ea adâvgă că, uidisitu cu urnimiili dati di vâsilii acâțati tu ceamaunâ, Bucureștiul va ș-aspunâ planurli di evacuari cându va s-dișcllidâ diznău spaţiul aerian ş-cându urdinarea va s-hibâ luyursitâ siyurâ. Tu catastisea a evoluţiilor di securitati tora tu ma nâpoi, ditu reghiunea a Orientului di Mesi, MAI dzâsi că mutreaști dipriunâ, cu angâtan, catastisea a țetăţeañilor româñi ți suntu aclo şi ţâni ligâtura totna cu misiunili diplomatiți şi ufițiili consulari ali României ditu reghiuni. Uidisitu cu spusa a ministrului, tuti misiunili şi ofițiili diplomatiți ali României ditu reghiunea acâțatâ tu ceamaunâ s-coordoneadzâ ş-cu reţeaua consularâ a alântor vâsilii ali Uniuni Ivropeanâ, ta s-poatâ s-da deadun asistenţâ a țetâţeañilor româñi ş-ivropeañi, ama ş-ta s-coordoneadzâ dialoglu politic cu liderilli a vâsiliilor ditu reghiuni. Ma multu, șefa ali diplomaţie românâ lo parti, dumânicâ dicsearâ, la unâ şedinţâ online a Consiliului di Emburlâki di Nafoarâ, ți s-adună la cllimarea a Analtului reprezentatu ali Uniuni Ivropeanâ ti Emburlâki di Nafoarâ şi Politicâ di Securitati, iu zburâ cu alanțâ minişțrâ ali Uniuni Ivropeanâ ti evoluţiili di ma nâpoi ditu Orientul di Mesi.
Autor: Daniela Budu
Apriduțarea: Mirela Biolan
