România treaţi la oara di vearã
Sãhãţli va s’hibã dati ninti cu unã oară, s’clleamã cã oara 3:00 va s’hibã oara 4:00.
Tașcu Lala, 28.03.2026, 19:56
Tru noaptea di 28 cãtã 29-lu di marţu, România treaţi la oara di vearã. Sãhãţli va s’hibã dati ninti cu unã oară, s’clleamã cã oara 3:00 va s’hibã oara 4:00. Dzuua di dumãnică va s’hibã nai ma şcurtã ditu an, avânda maş 23 di sãhãţ.
Apofasea s’bagã tu lucru cathi anu tu aţelu ditu soni weekend ditu meslu marţu tru majoritatea statiloru ditu Uniunea Europeanã, ti ufilisearea cama cu hãiri, videala naturalã și tra s’ñicureadzã consumlu di energhie.
Dinãcali cu aestã alãxeari, România treaţi di la oara standardu a Europãllei di Estu (EET) la oara di vearã a idyiului fusu oarar (EEST), hiindalui, tru kirolu di veara, cu trei sãhãţ ninti di Timpulu Universalu Coordonatu. Dumãnica ditu soni a meslui sumedru, 25-lu di sumeduru, vãsilia noastră s’toarnã la „oara di iarnă”, oara ufiţialã Timpul Legal Român, cari easti idyealui cu Timpulu standardu ali Europã di Estu.
Tru aestu kiro, oara di vearã nu easti ufilisitã tru vãsiliili di la Ecuator și di la tropiclu a Capricornului. Idyealui tru Japonia și China.
Autoru: Mariana Chiriţã
Armãnipsearea: Taşcu Lala
