Român’ii şi polimlu dit Estlu a viţinâl’ei Ucraina
Anexarea, luarea zorlea, di Moscova, ali peninsulâ Crimeea, dit Sud, ama şi agiutorlu finanţiar, logistic, politic şi militar, ti rebeliunea pro-arusâ dit regiunili dit estu, fu giudicat di tuţ ofiţialii di Bucureşti.
Bogdan Matei, 04.02.2015, 12:33
Anexarea, luarea zorlea, di Moscova, ali peninsulâ Crimeea, dit Sud, ama şi agiutorlu finanţiar, logistic, politic şi militar, ti rebeliunea pro-arusâ dit regiunili dit estu, fu giudicat di tuţ ofiţialii di Bucureşti.
Comisiili di speţialitati şi plenlu a Parlamentlui, aţel di tora prezidentu ali Românii, Klaus Iohannis, aţel di ninti prezidentu, Traian Băsescu, premierlu Victor Ponta, capii di anlu ţi tricu ali diplomaţii români, Titus Corlăţean şi Teodor Meleşcanu, ama şi titularlu di adzâ a scamnului, Bogdan Aurescu, apruchiarâ deadun, ca hiindalor agresiun’i acţiun’ili ali Arusii şi caftarâ tin’isearea mutrinda suveranitatea şi integritatea teritorialâ a viţinâl’ei Ucraina.
Ca membru tu Uniunea Europeanâ şi NATO, ca soţ di turlii strategicâ a SUA, România apruchie, fârâ s-minduiascâ vârâ ezitari, tuti pideapsili di turlii icunumicâ şi politicâ bagati tu practico di Bruxelles şi Washington contra ali Moscovâ. Anchisit tu ahurhearea al 2014, năulu regim pro-ocţidental di Kiev s-hârsi di andrupari ş-di partea ali Românii. Ucrainen’i agudiţ tu polimlu sândzâros ahurhit di aţel di ma ninti prezidentu pro-arus, Vikor Ianukovici, furâ agiutaţ tu spitali dit Bucureşti.
Tu Suţata Nordu-Atlanticâ, România ş-luă borgea ti asiguripsearea a securitatâl’ei ţiberneticâ ali Ucrainâ. Gailelu di cathi dzuâ a român’ilor andicra di catandisea ucraineanâ ari dauâ proti resorturi. Pi di unâ parti, Ucraina easti nai ma marli, teritorial şi demografic, dit viţin’ii ali Românii, cu cari amparti suti di kilometri di sinuri. Pi di altâ, ari aproapea unâ giumitati di milion di cetăţen’i român’i, nai ma mulţâl’ii di ei adunaţ pi aesti sinuri.
Anexati, tu anlu 1940, di Stalin, dupu un ultimatum, unâ parti a teritoriilor româneşţâ dit Estu — Nordul ali Bucovinâ, Nordul şi Sudlu ali Basarabii, ţinutlu Herţa, Nisia a Şerchilor — agiunsirâ, tu 1991, la Ucraina, ca vâsâlii di dupu aţea di ma ninti Uniuni Sovieticâ. Fârâ niţi un mobil revizionistu, intereslu a Bucureştiului andicra di catandisea greau di aclo mutreaşti maxus tin’isearea a îndrepturilor a comunitatâl’ei româneascâ. Ministrlu di Externi, Bogdan Aurescu, îi dzâsi, disnău, a ambasadorlui ali Ucrainâ la Bucureşti, Teofil Bauer, că el caftâ ca mobilizarea parţialâ, tu contextul a marilui conflictu dit Estul ali Ucrainâ, s-nu aibâ ici caracter selectiv şi s-afireascâ di discriminări, pi furn’ii di turlii etnicâ.
Zboarâli di soni yin dupu informaţiili uidisit cu cari, ta s-dânâseascâ fudzearea di mobilizari, autorităţli ucraineni apufusirâ s-bagâ tu practico restricţii di vgari tru xeani ti tuţ bârbaţl’ii încorporabili. România, dzâsi Aurescu, mutreaşti di aproapea aestu proţes şi easti tu contactu permanentu, prit consulatili generali dit câsâbadzl’ii Cernăuţi şi Odessa şi prit Ambasada di Kiev, cu reprezentanţâ ai etniţilor român’i, ama şi cu aţei ai autorităţlor ucrainieni, ţivili şi militari. Cetăţen’i loiali ali vâsâlii ucrainneanâ, etniţl’ii român’i nu vor s-agiungâ carni di tun tu un polim ţi nu easti a lor.
