Sãmtusearea picturãllei tu Catedrala Farãllei, nai marea bisearică ortodoxă ditu lumi
Pictura nai marillei bisearicã ortodoxă ditu lumi, Catedrala Națională, fu ayiusitã adzã, București, tru prezența a caplui a cratlui și alţã ufiţialli și oaspiţ cãlisiţ ditu vãsilie şi xinãtati.
Tașcu Lala, 27.10.2025, 20:13
Sãmtusearea picturãllei tu Catedrala Farãllei, nai marea bisearică ortodoxă ditu lumi
Pictura Catedralei Națională, spusã cu numa și Catedrala Nkiluearillei Fara fu ayiusitã adzã, București. Liturghisearea fu faptã di Patriarhul Ecumenicu a Constantinopolui, Bartolomeu I, şi di Patriarhul Daniel a Bisearicãllei Ortodoxã Românã, deadunu cu un soboru di 65 di ierarhi, 70 di prefţã şi 12 di diaconi.
La ayiuseari loarã parti prezidentulu Nicușor Dan, deadunu cu fumeallea a lui, prezidentulu ali Republicã Moldova, Maia Sandu, prezidenţãlli a Senatlui și a Camerãllei a Deputațlor, Mircea Abrudian și Sorin Grindianu, premierlu Ilie Bolojan, deadunu cu membri a Guvernului, foștilli șefañi a statlui Emil Constantinescu și Traian Băsescu. Ditu arada a oaspiţloru cãlisiţ nica eara Custodili a Cãrunãllei Vãsilikeascã Românã, Majestatea a Llei Margareta, deadunu cu Alteța a Lui Radu ali Românie, prezidentulu Academiillei Români, Ioan-Aurel Pop, Nunțiul Apostolicu tru România și Ripublica Moldova, Giampiero Glodir, Arhiepiscoplu Mitropolitu di București, Monseniorlu Aurel Percă, deadunu cu mulţã demnitari și ufiţialităț, catacum și oaspiţ ditu xeani.
Tutunãoarã, ñilli di oamiñi vinirã s’llia parti la liturghia di ayiusearti, ama aeşţã va s’aibã izini tu avlie și nãuntrulu ali catedralã după oara 20:00, ama și tru yinitoarili dzãli, până tru 31 di sumedru. Aţelli ţi eara viniţ puturã s’avdã liturghia di ayiuseari pi ecranili ndreapti nafoara ali catedralã.
Evenimentulu nsimneadzã și Tsentenarlu a Patriarhiillei Românã. Tru 2025 s’umplu 140 di ani di cându ali Bisearicã Ortodoxã Românã ãlli si pricãnãscu statutlu di Bisearicã Autocefală și 100 di ani di cându fu alinatã tu scara di Patriarhie.
Catedrala Națională easti unã casã a recordurloru. Easti nai ma analtă bisearicã ortodoxă ditu lumi cu aţeali 127 di meatri lundzimi și adunã nãuntru 5.000 di oamiñi. Iconostasea a Catedralãllei Naționalã di București fu pricãnãscutã di Academia Recordurloru Mondiali ca nai ma marea ditu lumi, cu unã lundzimi di 23,8 meatri și unã anãlţimi di 17,1 metri. După bitisearea a lucrărilor, Catedrala va s’aibã nai ma marea colecție interioară di picturi tru muzaicu, di aproapea 25 di ñillii di meatri pătraț.
Tru idyiulu kiro, finanțarea catedralãllei adusi multi controversi. Până tru aestu kiro, ccama di 250 di miliuñi di euro furã hãrgiuiţ ti anãlţari ansamblulu a Catedralãllei Naționalã. Cama di 200 di miliuñi di euro vinirã ditu pãradz publiţi, pritu Secretariatlu di Stat ti Culti, Primăria Capitalãllei, Primăria Sectorlui 1, Primăria Sectorlui 5 și alti instituții.
Unã parti ditu suţiitatea ţivilã, personalităț ditu lumea artiloru și a culturãllei, a divertismentului și sportului cutugursirã anãlţarea și finațarea edificiului, nica şi pritu un cãnticu silighitu aoa şi 9 añi, cu inițiativa pareiillei Taxi și agiumtã „virală”.
Autoru: Lica Manolache
Armãnipsearea: Tascu Lala
