Sistem antidroni tu portul Custanța
Sistemili autonomi di bâgari oarâ a dronilor furâ instalati tu Portul Custanţa dit notlu-apirita ali Românii.
Tașcu Lala, 11.08.2026, 23:10
Douâ sistemi di turlii Triton agiumsirâ operaţionali tu Românii, tu Portul Custanţa di la Amarea Lai. Echipamentili, spețializati tu bâgarea oarâ şi mutrearea cu angâtan a dronilor maritimi, furâ bâgati tu zona a digurlor di ncheari şi di not. Ursearea a lor va s-hibâ faptâ di câtrâ spețialișțâ ali companii americanâ Ocean Aero, ațel ți adră aesti sistemi. Autorităţli dzâsirâ că lucurlu Triton nu agudeaști sigurlâchea ali navigaţii şi tiñiseaști tuti nomurli di securitati câftati di acvatoriul portuar.
Bâgarea tu practichii a aților dauâ sistemi năi ari scupo s-bagâ oarâ cari suntu cama cu hâiri cearei di afireari ali infrastructurâ portuarâ şi s-creascâ capațitatea di apandisi la niscânti piricljuri di securitati ți pot s-facâ. Misura mutreaști, tutnâoarâ, anvârtușarea a livellui di sigurlâchi ti companiili ți ș-dizvârtescu lucrulu tu portu. Triton poati s-urdinâ autonom pi amari, pisuprâ, cama di 30 di dzâli, filisindalui mași energhia a soarlui ș-a vimtului, fudzindalui multu iruși, pânâ la 5 noduri (vârâ 9 km/h).
Sum apâ poati s-urdinâ 10 dzâli, cușia, cu 2 noduri (vârâ 3,7 km/h). Sistemlu adunâ dati dit mediul marin „pisuprâ ș-sum apâ” ta s-mutreascâ cu angâtan zona di la portu. Datili suntu pitricuti tu idyiul chiro câtrâ țentrul di cumândâseari, lucru ți agiutâ la intervenţii unâ-ș-unâ tu catastisi di ananghi.
Instalarea a sistemilor s-fați, di cara tu 5 di cirișar, unâ dronâ maritimâ ucraineanâ nu mata putu s-hibâ ursitâ dupâ ți fu aguditâ recepția di câtrâ aruși și plâscâni singurâ tu portul Custanța. Forțili di bâgari pi aradâ și structurli di securitati vinirâ ayoñea și scoasirâ oamiñil’i dit zonâ, ninti di plâscânearea ți nu pligui pi canâ. Di sibepea a polimlui dit vâsilia viținâ ari cripări cu dronili, ama, nu maș pi amari, ți ș-tu aerâ. Di cându Arusia aputursi Ucraina, dronili aruseşțâ intrarâ di cama di 30 di ori tu spaţiul aerian ali Românii. Mași estan furâ ânreghistrati 18 intrări fârâ izini tu spaţiul di aerâ românescu, iara cama lailu lucru s-feați tu 29 di mai, cându unâ ahtari mehanii agudi un bloc dit Galaţi ş-doi oamiñi furâ pliguiț.
Tu aestâ bitisitâ di stâmânâ, trei droni furâ surpati tu trei dzâli arada di aeronavi F-16 a Forţilor Aeriani Româneșțâ. Ambasadorlu arus Bucureşti fu cl’imat, luni, la Ministerlu di Lucri di Nafoarâ, iu âl’i furâ spusi fragmenti/părțâ dit dronili surpati pi teritoriul ali Românii şi âl’i si dzâsi că unlu dit diplomaţl’i ali misiuni lipseaști s-fugâ dit Românii. Partea româneascâ protestă susto andicra di aesti lucri numâsiti „acţiuni contra a nomlui şi niminduiti”. Moscova nu aproachi ici acuzaţiili, ți li luyursi “didip mincinoasi și un lucru di propagandâ” ș-feați tâmbihi că România easti tu piricl’u s-agiungâ parti tru polim.
Autor: Mihai Pelin
Apriduțearea: Mirela Biolan
