Sistemlu di sânâtati dit Românii
Hiindalui multi lai diagnosticat, di baia specialişţâ, ca un lândzit, tu moarti clinicâ, sistemlu sanitar românescu easti un mari apuţ di anvinirari şi frustrări.
Bogdan Matei, 26.05.2015, 12:48
Hiindalui multi lai diagnosticat, di baia specialişţâ, ca un lândzit, tu moarti clinicâ, sistemlu sanitar românescu easti un mari apuţ di anvinirari şi frustrări.
Tuţ oamin’ii lândziţ aduc câbati ti starea ici bunâ a spitalior, ti lipsa a yitriilor, ti pâradzii daţ a yeaţârlor, nâscânti ori ma mulţâ di aţei pi cari îi pâltirâ, aşi cum lipseaşti, ca asiguraţ.Yeaţârl’ii, şi ei aduc câbati ti greaua finanţari a sistemlui, ţi s-veadi tu lipsea a aparaturâl’ei, lipsa a personalului şi amintatiţli dip n’iţ.
Dealihea implicat di câti ori lipsea ş-afireascâ breasla, aţel di ma ninti prezidentu a Colegiului a Yeaţârlor, Vasile Astărăstoaie, tora condamnat ti aruşfeti, dzâţea că amintaticlu minim a unul yeatur dit Românii easti di aproapea 400 di euro, iara tu Danemarca treaţi di optu n’ii. Ş-că, ti furn’iea a amintatiţlor n’iţ, cama di 20.000 di yeaţâri fudzirâ tru xeani tu aeşţâ dit soni an’i.
Ş-el yeatur, aţel di tora Ministru di la Sânâtati, soţial-democratlu Nicolae Bănicioiu, vini cu un stog di pripuneri ta s-asiguripseascâ numirlu di specialişţâ ţi lipseascu tu spitali, tu sinfuniili a vgărilor tru xeani a tut ma mulţâ yeaţâri.
El câftă, Luni, andruparea a Parlamentului ti apruchiarea a unui proiectu di nom ahurhit di Guvern ti aetu lucru. Nicolae Bănicioiu: Easti zborlu di unâ crişteari a amintatiţlor a yeaţârilor. Dealihea easti unâ alâxeari a sistemlui, prit posibilitatea ca prit lucurlu pi cari l-u-adarâ tu spitalu public s-hibâ pâltiţ cum lipseaşti, icâ ş-ma multu.
Ti garda a yeaţârilor tu dzâlili di adyiea di cathi stâmânâ, ş-tu sârbâtorli legali, s-da, adusi aminti ministurlu, un spor di pânâ la 100%. Ti asiguripsearea a dzâlilor di gardâ, el mutreaşti bâgarea tu aestu sistem a yeaţârilor dit treilu an di rezidenţiat, sum vigl’eareaa unui yeatur cu experienţâ.
Dit opoziţii, liberal’ii nu ved ghini fezabilitatea a aluştui proiect. Deputatlu PNL, Horia Cristian: Io minduiescu că aestu lucru easti di niapruchiat, câ ţe sistemlu di andridzeari easti — ta s-hiu eufemistic — multu slab. Tu soni, minduiescu că problema easti multu complexâ şi ea lipseaşti s-avem viziuni şi lipseaşti unâ moaubeti mari, cu baia meatri bâgati tu practico.
Minduita a opoziţâl’ei aesti idyea ş-ti nai ma marea parti a publiclui, maxus dupu-ntreg haoslu dit ahurhita aluştui mesu, di cându easti zorlea câftat cardul di sânâtati. Iţi vizitâ la yeaturlu di fumeal’i, spital icâ farmacii poate s-hibâ decontatâ maşi cu aestu cardu.
Tu lipsa lui, s-caftâ unâ adeverinţâ ayoriea di la Casa Naţionalaâ di Asiguripseri di Sânâtati. Persoanili fârâ asigurari au pachetlu minim di serviţii medicali, iara serviţiili di urgenţâ s-da fârâ ufilisorea a cardului. Cându intră aestu nom tu practico, sutu di n’ii di asiguraţ nu-şi aveau apruchiatâ cardul, iar sistemlu informatic nu imnă tu protili dzâli.
