Sțenarii ti scâderea a pâhălui la combustibili
Autoritățli di București au tu umuti planuri ti scâdearea a pâhălui la combustibili
Tașcu Lala, 02.04.2026, 22:00
Ceamauna ditu Orientul di Mesi dusi la unu singiru di alâxeri negativi pi pâzarea a combustibililor, la criștearea a cotaţillei a barillui di petrol Brent ditu Amarea di Ncheari. Elu avea alinatâ, luni, la 119 dolari, nai ma analtul livel ditu meslu alunaru 2022, iara, marțâ, dipusi la 93 di dolari barilul. Criștearea s-feați di sibepea a frixillei că lundzearea a polimlu ditu Orientu poati s-aspargâ salami pâzărli energhetiți şi s-agudeascâ criştearea ali economie mondialâ.
Tu Românie, andicra di stâmâna ți tricu, pâhălu a motorinâllei criscu di arada cu 10 pârâgidzâț pi litru, agiungândalui la niscânti ducheni la cama di 8,70 lei, ti varianta standard, ş-la aproapea 9,40 lei ti ațea premium. Cât ti benzinâ, criştearea fu di mași ținți pârâgidzâț. Ma multi staţii di alimentari vindu benzina standard cu 8,37 lei pi litru, iar ațea premium – cu 9,10 lei.
Tu aestâ aradâ, autoritățli di București mutrescu cu mengâ criștearea a pâhălui a carburanţâlor. Aoa ș-pțân chiro, ministrul ali Energhie, Bogdan Ivan, dzâsi că statlu ari tu umuti ma multi sțenarii ta s-nu creascâ ș-m amultu pâhălu la pompâ, sțenarii ți li lâ li aspusi a ministrului di Finanţi ş-a premierlui Ilie Bolojan.
Unu sțenariu fu scâdearea a acțizilor ş-taxilor la carburanţâ ti unu chiro, ama prezidentul Nicuşor Dan mindueaști că nu lipseaști s-minteascâ la taxi şi acțizi ti combustibili ş-dzâsi nica că, catastisea easti mutritâ cu angâtanu di Consiliul a Concurenţâllei.
Bogdan Ivan dzâsi nica că unâ ditu variantili di lucru âlli acațâ tu isapi pi transportatori ş-pi agricultori, categoriili ți suntu nai ma multu zñipsiti di criştearea a pâhadzloru a carburanţâlor, ti cari va s-facâ unâ activitati mari tu dumenea agricolâ di primvearâ, di cara va s-aibâ para multu lucru.
Tutnâoarâ, Confederaţia a Operatorilor ş-a Transportatorilor Autorizaţ ditu Românie âlli caftâ ali chivernisi sâ scadâ acțizili la carburanţâ, dzâcândalui că s-poati s-agiungâ la curmări tu singirlu di aprovizionari cu pârmâtii. Consumatorilli ditu tutâ lumea duchescu criștearea a pâhălui la combustibili.
Uidisitu cu spusa a spețialișțâlor, criştearea a cotaţiilor a naftâllei pi pâzărli internaţionali va s-creascâ inflaţia tu Românie, tu meșlli ți yinu, ş-va s-bagâ presiuni pi bugetili a familiilor, tu arada a dependenţâllei multu mari di carburanţâ fosili ş-a pțâniloru investiţii alternativi energhetiți.
Profesorlu universitar di economie Cristian Păun dzâsi ti Agerpres că, ma s-andreagâ ayoñea catastisea ditu Orientul di Mesi, lucrâli va s-intrâ nâpoi tu avlachilu a loru. Ama, maca va s-tindâ pi unu chiro lungu, vahi pâhălu va s-armânâ iuva anvârliga di pâhadzlli di tora, iar atumțea va s-lipseascâ cathi unu s-aflâ cearei ti aeșțâ pâhadz mări di la pompâ.
Autor: Leyla Cheamil
Apriduțearea: Mirela Biolan
