Suțata di Cultură Macedo-Română ş-aleapsi naua cumânduseari.
Adunarea Ghenerală di aradã a Sutatãllei di Culturã Macedo-Românã (SCMR) s-dizvarti viniri, 12 di Cirișaru 2026, la scamnulu ali organizaţie di Bucureşti.
Tașcu Lala, 15.06.2026, 06:46
Tu arada din lucru a dzuuãllei era acâțati tu isapi, ntrâ altili, alidzearea-a prezidentului, a Cnsiliului di Cumânduseari şi a Comitetlui Directoru ali SCMR.
Dupâ debaturli și votlu mistico, domnul dr. Emil Ţîrcomnicu fu aleptu tu ipotisea di prezidentu a Suțatãllei di Cultură Macedo-Românã. Cu aestâ furñie, năulu prezidentu haristusi a membriloru trã pistusinea ți u-au tru nâsu și cundille câ va s-făcâ gaereț tra s’da silâ a lucãrlui tru suțatã și trâ unâ rolâ ma hâirlâticâ tu bana culturalã şi identitarã a comunitãțloru armânești, migliniti, istroromânã şi dacoromânã, ditu Balcani.
Tru ipotisea di vițeprezidențã ali SCMR furâ va alepțâ domnul Niculae Duşu – vițeprezidentu cu borgea trâ ligãtura cu mediul di emburlãchi, doamna Manuela Nevaci – viţeprezidentâ cu cercetarea ştiinţifică; domnul Puiu Haşoti – vițeprezidentu trâ ligâtura cu mediul politic şi instituţiili a statlui; domnul Pano Bakalli – vițeprezudentu trâ ligâturli cu armânilli ditu Balcani.
Ațelli doi membri ți s’adavgâ la Comitetlu Director suntu domñilli Mihai Toti şi Dumitru Caranica.
Trâ ipotisea di secretaru gheneralu ali SCMR fu aleptu domnulu Vlad Cubreacov, iarapoi trâ ipotisea di secretaru gheneralu agiutãtoruu – domnul Marian Crăciun.
Tu arada-a Adunarillei Gheneralâ, domnul acad. Nicolae Saramandu fu aleptu tu harea di prezidentu di tiñie ali Suțatâ di Cultură Macedo-Românã. Academicianlu Nicolae Saramandu haristusi ațiloru ți lu-andrupârâ și pitricu un zboru di ambãreaţã şi hãirlãticã tru lucru ti naua Parei di Cumânduseari.
Adunarea Ghenerală ş-aleapsi nãul Consiliu di Cumãnduseari tu pareia di 19 di membri, şi vulusi câftărli ti intrari tru SCMR.
Suţata di Cultură Macedo-Românã andrupaști ma largu scupolu a-llei istoricu şi doctrinaru și nâpoi cundilleadzâ cã va lu-ducâ ninti lucărlu cu cilâstãseari tra s-niinteadzâ patrimoniulu culturalu, lingvisticu şi identitaru a româñilor di tu notu-data a Dunăllei şi s-agiutâ trâ anvârtușearea ligâturloru anamisa di comunitãţli istoriți româneşti di tu spaţlu balcanic şi România.
Di la Biroulu di Presă ali SCMR
Apriduţearea: Taşcu Lala
