Uniunea Ivropeanâ s-coordoneadzâ
UI şi NATO va s-lucreadzâ ma multu ta s-anvârtușeadzâ securitatea ali reghiuni arcticâ.
Tașcu Lala, 09.02.2026, 16:46
Tu unâ hopâ greauâ di tensiuni cu Washington-lu, liderilli a vâsiliilor membri ditu Uniunea Ivropeanâ, adunaț, gioi, tu un Consiliu extraordinar, s-aspusirâ solidari cu Danemarca și Groenlanda, tu arada a vrerilor a prezidentului american, Donald Trump, ta s-ļea, ițido cumu, nisia arcticâ.
Șefañilli di stat și chivernisi ivropeañi s-achicâsirâ s-creascâ investițiili tu apârarea a llei, tu coordonari cu NATO. Tutnâoarâ, fu apufisitâ fâțearea ma lungâ, cu șasi meși a curmarillei a pâhadzlor UI ti SUA, cata cum ș-anchisearea a niscântor pâzârâpseri cu Stateli Uniti mutrindalui Carta ti Irini – minduitâ di prezidentului Trump – ta s-li bagâ arada cu borgili internaționali.
Uidisit cu spusa a corespondentului Radio România di Bruxelles, liderilli ivropeñni dzâc că ligâtura cu Statili Uniti easti para importantâ, ași că va s-treacâ pisti episodlu tensionat ți s-feați, tu chirolu dit soni. Cu tuti aesti, prezidentul a Consiliului Ivropean, António Costa, dzâți că bloclu comunitar aşteaptâ, tu yinitor, soțlu american strateghic s-poartâ cu idyea tiñie ți u aspuni și Uniunea.
Tu ți mutreaști prezidenta ali Comisie Ivropeanâ, Ursula von der Leyen, ea dzâsi că tu moabetea cuDonald Trump angrică pi solidaritatea ți u aspusi Uniunea andicra di Danemarca şi Groenlanda. Ama, dupâ aestu episod, Uniunea pricunoaşti că lipseaști s-acațâ ma multu tu isapi securitatea ali reghiuni arcticâ, iara ti aestu lucru, Ursula von der Leyen dzâți că investiţiili tu Groenlanda va s-hibâ diplo, vahi unâ flotâ ivropeanâ di aspârgâtoari di glleț ditu fondurli di apârari, cata cumu şi coordonarea cu NATO ta s-afireascâ cama ghini reghiunea.
Bruxelles, prezidentul Nicuşor Dan dzâți că tu yinitor s-poati ca România s-llia parti ca membrâ NATO la misiunili ali Alianţâ tu reghiunea arcticâ:
ʺMa s-nâ si caftâ și s-himu di câbuli, va s-adrăm ș-ahtari lucru, ama urghenţa a noastâ easti siyura flancul ditu apiritâ, di cara aoa easti fuvirseareaʺ. Ti furnia aesta – dzâți prezidentul – Statili Uniti armânu unu parteneru strateghicu di thimelliu ti securitatea ali Românie, idyea minduitâ u au ș-alti vâsilii membri ali Uniuni.
ʺSiyura că, tu chirolu di ma nâpoi, s-feațirâ niscânti mintireaji ică discontinuiț tu aestâ suțatâ transatlanticâ, ama ari cabaia furnii ta s-ducâ ninti și siyura că, ași cum dzâsimu di mai multi ori, dialoglu easti para di simasie.ʺ – cundille șefanlu a cratlui.
A că suntu pi doilu plan, subiectili Ucraina, Gaza și Mercosur furâ ș-eali acâțati tu isapi tu Consiliul Ivropean extraordinaru di gioi. Uniunea Ivropeanâ andrupaști ma largu Ucraina, pi di unâ parti, iara pi di altâ arti, duți ma largu moabețli ti garanţiili di sigurlâchi ti Kiev şi ti planlu di irini ursitu di americañi.
Tu ți mutreaști Gaza, cama multili craturi membri ali Uniune Ivropeanâ minduescu că Ivropa lipseaști s-hibâ amisticatâ tu proțeslu di irini ditu reghiuni. Neisi, di prota thesi easti și bâgarea tu practichie ti șcurtu chiro a achicâsearillei cu craturli ditu Mercosur, cata cumu şi pâzârâpsearea a niscântor achicâseri comerțiali cu alţâ giucâtori globali.
Autor: Roxana Vasile
Apriduțearea: Mirela Biolan
