Ursula von der Leyen fu aleaptâ diznău
Ursula von der Leyen, ditu Ghirmânii, fu aleaptâ diznâu pi ipothisea di prezidentu ali Comisie Evropeanâ ti aeșțâ 5 añi ți va s-yinâ, dupâ ți, ma ninti, malteza Roberta Metsola fu aleaptâ diznâu la cumândârsirea a PE.
Tașcu Lala, 21.07.2024, 22:39
Prezidenta ali CE, Ursula von der Leyen va s-aibâ ti nica 5 añi nai ma marea potisi executivâ dit UE, di cara fu votatâ, gioi, di Parlamentul di Strasbourg, tu prota sesiuni di dupâ alidzerli evroperlamentari. Andruparea di tora fu ma mari di ațea di la protlu mandat, a că forţili ți âlli suntu contra, a extremilor di nandreapta ş-di nastânga, ş-adrarâ ma vârtoasâ prezenţa tu leghislativlu comunitar.
Candidatura a llei avu unâ goadâ salami, uidisit cu spusa a analișțâlor, dupâ ți Curtea di Justiție ali UE apufusi, cu unâ dzuuâ ninti di alidzeri, că ea nu fu cabaia transparentâ cu duñeaua tu ți mutreaști contractili dit pandemie ti vacținurli anti-Covid-19. Ama, tuti curarâ ghini, dupâ pâzârâpseri multi, ți s-feațirâ pânâ tu tahinima a dzuuâllei di vot/psif, dupâ cum dzâc niscânti sursi politiți.
Ursula von der Leyen apruche 401 di voturi cu tuti că avea ananghi maș di giumitati plus unu dit tuti ațeali 720. Tu zborlu allei dit Parlamentu, ea zburâ ti unâ Evropâ vârtoasâ și tâxi că va s-adarâ dit industrie şi apârari lucârli di prota tesi. Șefa ali Comisie dzâsi nica unâ oarâ că va s-andrupascâ ma largu Ucraina pi tuti căllurli şi giudică acţiuñili a premierlui maghiar Viktor Orbán ți putea sâ slâgheascâ Uniunea, dupâ vizita a lui ți u adră aoa ș-pțân chiro tu Moscova, anda Ungaria ari prezidențillia ali UE.
Uidisit cu popularilli, pareia dit cari yini Ursula von der Leyen, majoritatea pro-evropeanâ, pro-Ucraina şi pro-statul di ndreptu dit Parlamentu yilipseaști realitatea a suțietatillei evropeanâ. Programlu ali Ursulâ von der Leyen va s-acațâ tu isapi em politiț di nandreapta, em ațeali di nastânga, și va s-caftâ s-da apandisi a câftărlor a țetâţenilor. Suțial-dimucraţlli, daua parei a majoritatillei, u andrupârâ von der Leyen câțe bâgă tu program politițli suțiali i ațeali ti agriculturâ.
Cama multili voturi chiruti dit coaliţia aților trei parei majoritari furâ di la Renew. Parlamentarilli româñi a pareillei votarâ ti doilu a llei mandat. Unâ parti di Verdzâ, a că nu suntu tu coaliţie, votarâ ti Ursula von der Leyen, ti furnia că bâgă tu planlu a llei politițli ti fisi ică planlu ti casi lișor te-a loari.
Lipseaști adrarea ali parei di comisari şi audierea a lor tu PE. Chivernisili a craturlor membri, prit cari și România, va s-lipseascâ s-aspunâ cathi un câti doi candidaţ – unâ mlleari ş-un bârbat – ti posturli di comisari evropeañi, dzâsi șefa a CE. Votlu ti comisie poati s-hibâ tu meslu yizmâciuñi.
Singura zñie dit dzuua a votlui fu mintearea agresivâ a evroparlamentarlui român Diana Şoşoacâ, datâ nafoarâ dit salâ di dauâ ori ti itia că dânâsi ședinţa. Zñia fu câtiyursitâ di tuti pareili parlamentari, tamam ș-di ațeali radicali i extremisti, şi giudicatâ di evroparlamentarilli româñi că aspardzi imaghinea ali Românie la livel internaţional. Purtaticlu ali senatoari di ma ninti, luyursitâ politițianâ pro-arusâ şi liderâ a partidlui populistu SOS România, fu idyea cu ațel dit Parlamentul di București, ama tu Bruxelles purtaticlu niuidisit ș-câlcarea a nomurlor s-pidipseaști unâșunâ.
Autor: Mihai Pelin
Apriduțearea: Mirela Sima-Biolan
