Vizita di lucru a secretarlui di stat, Veaceslav Șaramet, tu Arbinişie
Comunitatea di armânʹi dit Ripublica Arbinişia easti tru prota thesi tu arada di lucru a Ministerlui tră Românʹilʹi di Iuţido (MpRP); tru aestă noimă, secretarlu di stat Veaceslav Șaramet feaţi tru chirolu 11-13 di marţu 2018 ună vizită di lucru tru teritoriu. Agenda a demnitarlui român acătă tru isapi andamusi cu reprezentanțălʹi a mediului asociativ, reprezentanță a Ministerlui tra Europa și Afaceri Externi și a Parlamentului dit Arbinişie.
România Internațional, 13.03.2018, 21:07
Comunitatea di armânʹi dit Ripublica Arbinişia easti tru prota thesi tu arada di lucru a Ministerlui tră Românʹilʹi di Iuţido (MpRP); tru aestă noimă, secretarlu di stat Veaceslav Șaramet feaţi tru chirolu 11-13 di marţu 2018 ună vizită di lucru tru teritoriu. Agenda a demnitarlui român acătă tru isapi andamusi cu reprezentanțălʹi a mediului asociativ, reprezentanță a Ministerlui tra Europa și Afaceri Externi și a Parlamentului dit Arbinişie.
Tru arada ali andamusi cu reprezentanțălʹi a Suţatălʹei Culturală a Armânʹilor dit Arbinişie, Fundația Culturală Armânească Nicolae Iorga” Saranda și a Ligălʹei a Armânʹilor dit Arbinişie, secretarlu di stat năpoi adusi aminti ti simasia cabaia mari ţi u da Guvernul ali Românie ti comunitățli di românʹi di iuţido prit thimilʹiusearea a unui minister cilăstisitoru, cari are tru scupo ţănearea tu bană, criştearea și afirmarea a identitatilʹei a aiştor. Moeabeţli aplicati avură tru amprotusa tema a Nomlui nr. 96/2017 tră viglʹearea a minoritățlor naționali tru Ripublica Arbinişia, prit cari armânʹilʹi amintară statutlu ufiţial di minoritati națională. Reprezentanțălʹi a suţatilor părăstisiră lucărlu a lor și, tru aestă noimă, demnitarlu român acăţă tru moeabeti programili di finanțari a Ministerlui tra Românʹilʹi di Iuţido.
Tru arada a vizitălʹei di lucru secretarlu di stat avu ună andamusi cu domnul Taulant Balla, viţeprezidentul ali Comisie tra integrari europeană a Parlamentului arbinesu. Veaceslav Șaramet ălʹi hiritisi tră vulusearea a nomlui prit care armânʹilʹi sunt pricunuscuț ca minoritati națională, dimecu easti un amintaticu tră cultura română. Tutunăoară, aestu și spusi dişclʹidearea tră alăxearea di buni practiţ tru ţi mutreaşti integrarea a minoritățlor. Un altu lucru acătat tru moeabeti fu aţel a acordurlor di colaborari/ frăţălʹie, MpRP hiindalui coordonator ali campanie Centenar prit frăţălʹie”, tru aestă noimă, parlamentarlu arbinesu și spusi sinferlu și vrearea ta s-bagă tu lucru ahtărli proiecti.
Tru duchimia că România va s-hibă la Prezidenţilʹa Consiliul Uniunilʹei Europeană, tru protlu semestru a anlui 2019, și tru duchimăsearea a anlui Centenar, andamusea cu domnul Etjen Xhafaj, diputy minister tru Ministerlu tră Europa și afaceri externi, avu tru prota thesi aesti dauă temi și turlia tru cari aesţă ălʹi mutrescu armânʹilʹi dit Arbinişie. Aşe, emu demnitarlu român, emu aţel arbinesu, și spusiră vrearea tra s-ţănă ma largu un dialog niacumtinat ti hăirlăticlu a daulilor comunităț.
Tu arada a andamusilor secretarlu di stat s-adună cu reprezentanțălʹi a comunitățlor di armânʹi dit localitățli Divjaka și Korcea.
Armânipsearea: Taşcu Lala
