România – hub reghional di energhie nuclearâ?
România pâzârâpsi Washington finanţări di 3,5 miliardi di dolari ti proiecti strateghiți tu adrarea şi transportul di energhie şi gazi naturali.
Tașcu Lala, 07.05.2026, 15:43
România poati s-agiungâ tu añilli ți va s-yinâ nai ma marli hub energhetic nuclear dit reghiuni, di cara s-fac investiţii mări tu adrarea şi infrastructura aluștui sector, dzâți ministrul di resortu Bogdan Ivan, dupâ vizita ți u adră dzâlili di ma nâpoi tu Statili Uniti ali Americâ.
El dzâsi că scupolu di prota thesi lipseaști s-hibâ criștearea a capațitățloru di adrari, deadun cu scâdearea a dependenţâllei di importuri. Dupâ moabețli cu reprezentanţâlli a niscântor instituţii finanțiari internaţionali şi ufițiali americañi pi thesi analtâ, Bogdan Ivan deadi tu șteari că pâzârâpsi ti România, Washington, investiţii ti energhia nuclearâ şi hidro, cata cum ş-ti sectorlu di exploatari a gazilor naturali, di 3,5 miliardi di dolari. Easti zborlu di unâ finanţari di pânâ la 3 miliardi di dolari ti modernizarea a Unitatillei 1 di Cernavodâ şi sâ zburâ, tutnâoarâ, di finanţarea a Unitatillei 3 şi 4, ti cari minstrul spuni că va s-facâ anvârliga di 19.000 di locuri di lucru şi 33% di energhie nuclearâ tu producţia naţionalâ.
Tutnâoarâ, luarâ unâ andrupari ti proiectili di gazi naturali dit Amarea Lai şi ti ânvrtușarea a rollului ali Românie tu reghiuni prit unâ finanţari di aproapea 500 di miliui di dolari.
Bogdan Ivan: „Dupâ andamusili ți li avu, la nai ma marea thesi tu Statili Uniti ali Americâ, cu prezidentul a Bancâllei Mondialâ, cu prezidentul US Exim Bank, cu ministrul ali energhie dit Stati, vinim cu un singir di lucri ți suntu di mari simasie ti Românie, dirmi: unâ achicâseari ți va s-ducâ la finanţarea ti adrarea di energhi nuclearâ dit vâsilia a noastâ, Cernavodâ, dit partea ali Bancâ Mondialâ.
România va s-hibâ prota vâsilie idt lumi cari finanţeadzâ energhi nuclearâ cu pâradz cu toc multu ñic – ş-anda dzâc ahtari lcuru, zburăscu di tocuri ți suntu anamisa di 1 şi 1,5%, andicra di 6-7%, cât si âmprumutâ adzâ România. Nâ asiguripsim că tu aeșțâ 30 di añi ți va s-yinâ va s-adrăm energhie electricâ para multâ, ti un pâhă ți s-nu treacâ di 100 di evradz pi megawatt, lucru ți nâ adarâ s-him di pistusini şi, siyura, axia di crișteari icunomicâ a vâsilillei a noastâ.”
București, Bogdan Ivan deadi hâbarea că ministerlu ți lu cumândâseaști sri chiola unâ strateghi ti chiro lungu ti criştearea a producţillei di energhie, ași că andreapti un actu normativ ta s-lâ da curai a investiţiilor tu dumeni. Easti zborlu di un proiectu di ordonanţâ prit cari investiţiili ma mări di 300 di miliuni di evradz tu dumenea energheticâ va s-hibâ luyursiț că ti elli au sinferu naţional şi va s-veadâ u singir di hâiri ți s-ayuñiseascâ darea a tâtâlor izinilor, cata cum și andrupari ți s-nu hibâ ndreptu datâ dit partea a cratlui, deadi asiguripseri ministrul.
Autor: Daniela Budu
Apriduțearea: Mirela Biolan
