Moabeț politiți fârâ canâ hâiri
Prota rundâ di moabeț ti adrarea ali unâ nauâ chivernisi tu Românie s-bitisi fârâ canâ ici hâiri.
Tașcu Lala, 01.06.2026, 14:02
Moabețli anamisa di șeflu a cratlui, Nicușor Dan, și partiili parlamentari ti spunearea a unlui nâu premier s-bitisirâ fârâ canâ ici hâiri ți s-ducâ la andridzearea a catastisillei politicâ. Moabețli s-feațirâ di itia că chivernisea minoritarâ cumândâsitâ di liberallu Ilie Bolojan fu datâ-mpadi prit moţiuni di țenzurâ, cu voturili/psifurli PSD, ți eara aoa ș-pțân chiro parti dit suțâllia pro-ivropeanâ, şi ali AUR.
Dupâ andamusi prezidentul dzâsi că va s-ducâ ma largu singirlu di moabeț pânâ cându va s-aflâ unâ turlie di majoritati susto pro-ocțidentalâ. El lâ feați tâmbihi a parlamentarilor s-agiungâ tu un chiro cu dichi la un numitor comun, thimilliusit pi formuli „coerentiˮ şi pripuniri „uidisitiˮ, dzâcândalui că easti di prota thesi ca partiili sâ s-aspunâ maturi. Nicușor Dan zburâ cu reprezentanţâlli a PSD, AUR, PNL, USR, UDMR, minorităţilor naţionali, S.O.S. România şi POT.
Tora di oarâ, nu s-veadi canâ suțâlli ți s-andrupascâ adrarea ali unâ nauâ chivernisi. PSD nu apruche un nău Executiv cumândâsit di Ilie Bolojan. Liderlu ali formațiuni, Sorin Grindeanu, dzâsi că partia nu va unâ suțâlli nafoara partiilor proocțidentali și tunuseaști un nău Executiv cumândâsit di Ilie Bolojan. Sursi politiți dzâc că PSD va ma multu un premier politic, iara, „ma s-hibâ ananghiˮ, suțial-dimucraţlli pot sâ-și llia borgea ti un prot-ministru.
Tu arada a llei, partia AUR âlli dzâsi a şeflui a statlui, prit boațea a prezidentului ali formaţiuni, George Simion, că și-llia borgea ta s-intrâ tu chivernisi. El dzâsi că lli-aspusi a prezidentului un plan di misuri ti scutearea ali Românie dit crizâ ș-că, ma s-nu s-aflâ unâ majoritati parlamentarâ ti unâ nauâ Chivernisi, ceareia lipseaști s-hibâ turnarea la electorat.
Dit partea alantâ, tâbâbia a liberalilor nu va s-aproachi ideea ali unâ chivernisi cu PSD, ama niți ațea ali unâ chivernisi cumândâsitâ di un tehnocrat, dit cari s-facâ parti şi suțial-dimucraţlli. Prezidentul PNL, Ilie Bolojan, dzâsi că maca, diznău, tu unâ turlie i altâ, directâ ică indirectâ, va s-ducâ ma largu unâ ahtari suțâlli cu Partia Suțial Dimucratâ, va s-adarâ iarapoi alatusili dit chirolu di ma ninti. USR dzâsi că va s-intrâ tu opoziţie, maca PSD va s-aflâ unâ majoritati parlamentarâ ta s-adarâ naua Chivernisi. Liderlu a partillei, Dominic Fritz, luyurseaști că ceareia ti criza di tora easti unâ cearei politicâ. Ama, UDMR mindueaști că lipseaști adrari unâ suțâlli di chivernisi cum fu ma ninti.
Uidisit cu spusa a minorităţilor naţionali dit Parlamentu, lipseaști adrari diznău unâ suțâlli pi idyea direcţie euroatlanticâ. Prezidenta S.O.S. România, eurodeputata Diana Şoşoacâ, dzâsi că şeflu a statlui andreapsi tu unâ turlie neconstituţionalâ moabeț cu partiili parlamentari, iara prezidenta ali Partie a Oamiñilor Tiniri (POT), Anamaria Gavrilă, dzâsi că formaţiunea ți u cumândâseaști va s-andrupascâ ițido formulâ proocțidentalâ di chivernisi.
Autor: Leyla Cheamil
Apriduțearea: Mirela Biolan
