Apanadisi la un unâ apofasi CCR
CCR u aspusi constituţionalâ pruvidearea ți dzâți că alepțâl’i ți va s-hibâ aflaț câbati di incompatibilitati, pot ta ș-chearâ mandatlu.
Tașcu Lala, 01.09.2026, 12:24
Parlamentul di București va s-hibâ cl’imat diznău tu sesiuni extraordinarâ – apofasea di luni ali Curti Constituţionalâ (CCR) pi năulu nom a integritatil’ei, jalon ditu PNRR, lâ bagâ zori a alepțâlor s-alâxeascâ ayon’ia actul normativ ta s-nu chcearâ România 770 di miliuni di evradz. Nomlu va bitiseari pânâ tu bitisita a meslui.
Giudicâtoril’i constituţionali și-aspusirâ apofasea ti sesizărili bâgati di prezidentul Nicuşor Dan, cata cum şi di PNL şi USR, ți au contestatâ adâvgărli bâgati di PSD şi AUR (opoziția suțial-democratâ ș-ațea populistâ, ultranaționalistâ) mutrindalui pidipsearea retroactivâ a alepțâlor locali ți suntu tu incompatibilitati şi tindearea a borgil’ei di scuteari tu migdani a avearil’ei ş-a sinferurilor ş-ti parteneril’i di banâ.
Magistraţl’i CCR validarâ amendamentul ți alasâ fârâ mandat dimarhil’i spuși incompatibili, ama nu apruchearâ borgea ti parteneril’i di banâ a demnitarilor ta sâ-și aspunâ averli. Nica ma multu, CCR dzâsi nica unâ oarâ că declaraţiili di aveari nu va s-hibâ scoasi tu padi. Eali armân secreti, la Aghenţia Naţionalâ di Integritati. Tu minduita a magistraţilor, legiuitorul nu poati s-da borgi giuridiți tu ți mutreaști oamin’l’i ți au ligâturi personali nipricunuscuti giuridic di stat.
Problema ahurhi s-aibâ unâ vârtoasâ âncârcari politicâ, di cara fu ligatâ di catastisea ali Mirabelâ Grădinaru, partenera di banâ a prezidentului Nicușor Dan. Ea scoasi tu padi declarațiili di aveari ș-di sinferuri, hiindalui spusu ca un gestu di transparențâ.
Tu ți mutreaști andridzearea a misurilor di pidipseari a ceamaunâl’ei di sinferuri, ea intrâ tu marja di luyurseari a legiuitorlui, iara bâgarea a lor di cu chiro tu practichie pritu normi tranzitorii aprucheati s-feați cu tin’isearea a Constituţil’ei, dzâcu giudicâtoril’i.
Cama di 120 di oamin’i suntu tu piricl’iu sâ-și chearâ tesea dupâ apofasea ali CCR, ți pruveadi chirearea a mandatlui i a tesil’ei, maca ari apofasi definitivi tu instanță mutrindalui câlcarea a reghimlui a incompatibilitățlor ș-a ceamaunâl’ei di sinferuri. Prit eali ari 47 di demnitari ți au, tora, thesi electivi ică publiți. Cama cunuscuta numâ easti ațea a dimarhului di Timişoara, Dominic Fritz, ți lo tu meslu cirișar unâ apofasi definitivâ la Analta Curti di Casație și Justiție.
Liderlu USR reacţionă cușia și bâgă stepsu di un abuz di puteari validatu di magistraţi. El easti nihârsitu că textul a nomlui s-bagâ tu practico retroactiv şi deadi tu șteari că va s-ducâ la Curtea Europeanâ a Ndrepturilor a Omlui.
Adunarea a CCR s-feați tu arada a niachicâserilor ditu spatiul public di la unâ andamusi faptâ aoa ș-pțân chiro, ți s-feați dinapandica, la Senat, anamisa di prezidenta CCR, Simina Tănăsescu, şi premierlu interimar, Ilie Bolojan.
Consiliul Superior ali Magistraturâ, cumândâserli a instanţilor şi suțatili di magistraţ câftarâ limbidzeri publiți di ananghi, luyursindalui că unâ ahtari andamusi informalâ duți la seamni di antribari leghitimi şi agudeaști pistusinea tu imparţialitatea ali giustiţie.
Apandisea ali şefâ a CCR, Simina Tănăsescu, fu că ea nu aproachi susto iți speculaţie, dzâcândalui că maobețli s-feațirâ pi temi administrativi şi instituţionali, fârâ canâ ligâturâ cu dosarili ți suntu pi rol.
Tutnâoarâ, prezidenta CCR numâsi altu giudicâtor – raportor ți âl’i lo atribuţiili tu dosarlu mutrindalui Nomlu a Integritatil’ei.
Autor: Mihai Pelin
Apriduțearea: Mirela Biolan
