Unu nâu premier numâsitu
Prezidentul lu pripusi ti thesea di premieru pi evroparlamentarlu Siegfried Mureşan.
Tașcu Lala, 18.09.2026, 16:19
Siegfried Mureşan, unu politicianu di 44 di añi ți spudixi Berlin şi Bruxelles ninti s-agiungâ activu tu politica di Bucureşti, easti pripunirea a prezidentului Nicuşor Dan ti thesea di premier. Treia pripuniri tu cama di ținți meși di cându chivernisea a liberallui Ilie Bolojan, adratâ ditu PNL, USR și UDMR, fu datâ-mpadi di Parlamentu pritu moțiuni di cenzurâ.
Tu catastisea tu cari vor sâ s-facâ mași a lor ș-nu aproachi altu țiva, formațiunili reprezentati tu Leghislativlu di București nu furâ di câbili cu ațeali dauâ pripuniri di ma ninti ti premieru a șeflui statului: unu evroparlamentaru – Eugen Tomac – ți nu eara tu niți unu ditu partidili parlamentari ică unu liberalu – Adrian Veștea – nivrut tamam di unâ parti ditu colegañil’i a lui. Cândâsitu că nu va s-poatâ s-aibâ unâ majoritati, Tomac ș-depusi mandatlu ninti ta s-ducâ tu Parlamentu ta s-caftâ unu psifu di pistusini ti pareia a lui. Tu ți mutreati cabinetlu adratu di Veștea, aestu nu avu psifurli di cari avea annghi.
Va s-aibâ tora hâiri naua nominalizari di premier alu Siegfried Mureşan, membru PNL? Va s-angreacâ că easti evroparlamentaru ditu 2014 iara, tora, vițeprezidentu ali Parei PPI ditu Parlamentul Evropean? Ași cum dzâsi prezidentulu Nicușor Dan, tora di oarâ, el ari cama multili psifuri – aspusi di PNL, USR și UDMR – la moabețli ți s-feațirâ ninti di numâseari.
Nicuşor Dan: „Pi ninga că fu pripus di ațeali trei partidi, easti ș-unu omu ți ari experienţâ tu Parlamentul Evropean, unu omu ți ari pâzârâpsitâ pi hiotea a chirolui lucri di simasie, dirmi ari expertiza ti aestâ thesi. Ma s-acâțămu tu isapi mirăchili ți partidili ș-li aspusirâ emu public, emu adzâ pi moabeț, borgea a protlui ministru numâsitu va s-hibâ unâ borgi cu zori.ʺ
Uidisitu cu nomlu, Siegfried Mureșan ari chiro 10 dzâli ta sâ-și andreagâ cabinetlu şi s-caftâ psiflu di pistusini a Parlamentului, misiuni cu zori. Ari ananghi di andruaprea a 233 di parlamentari ți sâ-l’i andrupascâ programul şi lista di minișțrâ, anda treili partidi ți lu pripusirâ au deadunu mași 170. PNL și USR vedu tu Siegfried Mureşan unu politicianu di besâ, irbapi ș-cu unâ experienţâ ți va bâgari pi lucru ti bunlu a vâsilil’ei. Ama, ehturlu a lor politic di tora, ți eara ma ninti soț la chivernisi – PSD – dzâți că evroparlamentarlu feați, Bruxelles, unâ campanie contra ali Românie ti tâl’earea a fondurlor evropeani, iara prudusirea nu poati s-uidiseascâ cu apârarea a sinferuriloru naţionali. Neisi, naționalișțâl’i ditu AUR ș-u țân ma largu apofasea ta s-nu da psiflu ti unâ chivernisi ditu cari el’i nu facu parti.
Maca executivlu adratu di Siegfried Mureșan nu va s-hibâ cu hâiri ș-nu va s-hibâ aprucheatu di Leghislativu, România poati s-intrâ tu sțenariul a alidzeriloru antițipati. Tamam și prezidentulu Nicușor Dan dzâsi că bâgă oarâ că formațiunili politiți zburăscu ma multu di sinferuri electorali, iara nu di sinferlu naţional. El şi-aspusi, ama, cândâsearea că România va s-armânâ pi calea pro-ocțidentalâ şi va ş-umplâ borgili, bași ș-ațeali mutrindalui traiectoria fiscalâ.
Autor: Roxana Vasile
Apriduțearea: Mirela Biolan
