Apofasi ta s’ahurhească diznău exporturli di oi şi capri
Autoritățli români li duc ma largu muabeţli ta s’da cali la exporturli di oi și capri.
Tașcu Lala, 22.09.2026, 19:55
Easti un semnu bunu vulusearea ţi u faţi Comisia Europeană cu Planlu di Acţiuni ali Românie tra s’da cali ti exporturli di oi şi capri. Uidisitu cu spusa a ministurlui interimaru ali Agricultură şi Dezvoltari Rurală, Tanczos Barna, vulusearea easti prota jgl’ioată anănghisită tra s’ahurhească comerţulu internaţionalu tru aestu sectoru, a deapoa instituția li duţi ma largu gaereţli diplomatiţi tră adoptarea apofasiloru anănghisiti tra s’ahurhească diznău exporturli.
Tutunăoară, el cundil’e că Autoritatea Naţională Sanitaru Veterinară şi tră Siguranţa Alimentiloru (ANSVSA) lipseaşti s’bagă tru practico ună turlie profesionistu, planlu di acţiuni. Stămâna ţi tricu, picurarl’i mutară capu București, hiinda niifharistusiţ tră cumu s’faţi chivernisearea-a fucuriniloru di pestă ică variolă ovină şi meatrili ţi ducu la vătămarea a prăvdzăloru, ama şi di itia că nu da cali ti exporturli cu oi şi capri di itia a lăngoaril’ei la n’iţli prăvdză ţi arumigă.
Ministurlu ali Agricultură cundil’e că, tru muabetea ţi u avu pi turlia di videoconferinţă cu comisarlu european tră sănătati şi prucuchia a nimal’iloru, Oliver Varhelyi, părăstisi misurli ţi li lo România tră curmarea-a lăngăoaril’ei la ñ’iţli arumigătoari şi ali variolă la oi, cundil’e simasia ti simfunizarea cu regulili europeani tră s’da cali ti exportulu a prăvdzăloru vaccinati şi lă haristusi a experţăloru di la Comisia Europeană tră colaborarea tru meşl’I ditu soni.
Planlu pitricutu tru 11 di yismăciuni la Comisie pruveadi, ntră altili, administrarea diferenţiată a aţiloru 1,3 miliun’i di vaccinuri loati fără păradz di la forlu europeanu. Ceareia apufusită veagl’e şi nu zn’iipseaşti niţi nă turlie exporturli di carcasi şi produsi ditu lapti, di itia că eara băgată tru lucru schema completă di imunizari. Ma multu di aesta, ună ş-ună cu vulusearea-a planlui, ANSVSA securiză şasi păzări terţi di exportu tru condiţii di vaccinari tru schemă completă, pritu simnarea di tratati internaţionali cu Arabia Saudită, Iordania, Maroc, Tunisia, Israel şi Libia.
Pi ningă aestea, alti şapti acorduri di idyea turlie suntu pi cali di păzărăpseari avansată. Aeste va s-asigurispsească ună diversitati di păzări cu darea-loarea, ună şi ună ţi năulu epidimiologhicu va s’bagă tru practico. Autoritatea Naţională Sanitaru Veterinară şi tră Siguranţa Alimentiloru cundil’e că tuti aţeali 1,3 miliun’i di dozi di vaccinu loati di la forlu european va s’hibă chivernisiti acutotalui fără pălteari, fără niţi ună hargi tră crescătorl’ii di prvdză. Tutunăoară, mecanismili di compensari guvernamentală justă armânu acutotslui tru lucru ti ufiliseari tra s-ndrupască fermierl’ii zn’iipsiţ di fucurini tru proţeslu di repopulari a exploataţiiloru.
Datili ufiţiali spunu că, tru anlu 2026, numirlu di oi tăl’eati pănă tru aestă oară, cu tin’isearea acutotalui a normilor naţionali şi europeani şi tră vigl’earea tra s-nu s-arăspăndească variola și pesta a n’iţloru arumigătoari easti di aproapea 19.000, aea ţi reprezintă 0,13% ditu numirlu totalu estimat di capiti pi nivelu naţionalu.
Autor: Leyla Cheamil
Armânipsearea: Taşcu Lala
