Piricl’iu tru Amarea Lae
Subiectulu ti securitatea la Amarea Lae easti tu menga ufiţial’iloru european’i.
Tașcu Lala, 17.11.2026, 18:02
Numirlu a obiectiloru ligati di polimlu ditu Ucraina aflati tru cupan’ea ali Amarea Lae, maxusu droni, criscu multu di multu tru meşl’I ditu soni. Ună parti di eali avea fortumi niplăscăniti. Nai multi fură aflati tru apili ali Românie, Vărgărie și Turchie.
Dzălili di ma ninti, ună aeronavă militară franceză, chindurită tru România la baza aeriană di Mihail Kogălniceanu, duchi elementili di la dauă droni aerieani ţi s-mina tru derivă la 45 di mili marini di coasta românească. Misiun’ile di intervenţie şi evaluari pirotehnică programati di scafandril’i militari fură amânati di itia chirolui multu slabu-condiţiili meteorologhiţi nifavorabile, ama va s-ahurhească ună ş-ună căndu chirolu va s’hibă ma bunu ti dizvărtearea tru sigurlăchi a operaţiunilor.
Di altă parti, tut tru apili teritoriali ali Românie, tru dzălili ditu soni, ma multi pampori comerciali fură aguditi di droni. Autorităţli români confirmară că, sâmbătă, trei pampori comerciali fură aguditi tru largul a coastăl’ei română ali Amarea Lae. Premierlu Luca Niculescu spusi că ataca easti „inacceptabilă” şi ună „călcari a ndreptului internaţional”. Cu ună dzuuă ma ninti, ună altă pampori cu părmătii, idyealui, fu agudită.
Atacurli s-feaţiră aproapea di canalu Sulina, ună cali maritimă cl’eaie cari leagă Dunărea di Amarea Lae şi cari easti ufilisită di Ucraina tră exportul di părmătii. Tutunăoară, radarili a Ministerlui ali Apărari ditu România aflară ţinti aeriene tru zonă, iara Forţili Aeriene Române pitricură avioani chiniyi tra s’vegl’e catandisea. Tru aestă hală mintită, ună parei navală di combăteari a miniloru marini ditu Amarea Lae, MCN Black Sea, anchisi ditu portulu vărgărescu Varna cătă aţelu românescu Constanţa şi va s-armână tru zonă până tru 18 di brumaru.
Caplu ali diplomaţie, Dan Neculăescu, spuni că ari loată asiguripseri di la partenerl’ii externi că România va s-hibă agiutată suplimentaru cu echipamenti tra s-ţănă cheptu la inţidentili di la Amarea Lae. Securitatea di aclo fu, luni, unu di subiectili acăţati tu muabeti tru Consiliulu a Miniştrilor di Externi di Bruxelles, cata cum şi tru ună andamasi la cari loară parti statili riverani şi aţeali ditu reghiunea a Caucazlui. Dan Neculăescu spuni că hăbărisi UE şi Aliaţl’ii ti inţidentili di la Amarea Lae, pi cari li lugurseaşti ti nistrăxeari emu ditu videala a fuvirsearil’ei, emu di itia-a numirlui.
Rusia u adusi Amarea Lae tu catandisea tra s’hibă cu nai marli piricl’iu locu maritimu ditu lumi, feaţi timbihi și șefa diplomațiil’ei europeani, Kaja Kallas. Ea feaţi timbihi că atacurli ali Moscovă pisupra a pamporiloru comerciali, maxusu a aţiloru ţi poartă yiptu, fuvirsescu securitatea alimentară globală. Cundil’e, tutunăoară, că polimlu ditu Ucraina bagă tu piricl’iu căl’iurli comerciali ditu Amarea Lae și zn’iipsescu cooperarea economică și energhetică anamisa di craturli ditu reghiuni. Kaja Kallas spusi că UE investeaști 50 di miliun’i di euro tră hăirlăticlu a securitatil’ei maritimă tru reghiuni.
Autor: Mihai Pelin
Armânipsearea: Taşcu Lala