Inflația tru UE, pi creaştiri
Rata anuală ali inflaţie tru zona euro şi tru UE criscu până la 4%, tru sumedru, iarapoi România easti diznău văsilia cu nai ma marea rată anuală ali inflaţie, uidisitu cu Eurostat.
Tașcu Lala, 19.11.2026, 16:43
Inflația diznău yini tu prota thesi tru prim-planlu ali economie europeană, iarapoi hăbărli nu suntu ici mplini di curayiu. După ndoi meşi tru cari ritmolu a scuncherloru părea s-hibă stabilu, sumedurlu adusi ună nauă silă a păhadzloru tru Uniuni, uidisitu cu aţeali ditu soni dati publicati di Eurostat. Aeşţă spunu că rata anuală ali inflație tru UE agiumsi la 4% tru sumedru, di la 3,8% tru meslu di ma ninti, ună evoluție idyea s-feaţi şi tru zona euro.
Creastirea easti cu ahâtu ma yilipsitoari cu cât, tru sumedru anlu ţi tricu, inflația eara di 2,5% la nivelu ali UE și di 2,1% tru zona euro. Meslu ţi tricu, văsiliili ali Uniuni cu naima scădzuti rati anuali ali inflaţie fură: Suedia (0,6%), Cehia şi Danemarca (dauli cu 2,1%). Comparativ cu catandisea ditu yismăciuni, rata anuală ali inflaţie scădzu tru nauă stati membri, armasi stabilă tru dauă şi criscu tru 16 văsilii membri.
Tru aestu tablou europeanu, România ari un locu ici ti zilipseari: cu ună inflație anuală di 7% tru sumedru – ma mari, neise, cu giumitati di punctu proţentualu andicra di aţea ditu meslu yismăciuni – văsilia easti diznău tu caplu a clasamentului. Ună contraperformanță nivrută, cari confirmă chindinlu ali economie românești tru alumta cu scuncherli. Dupu România yini deapoa Lituania, cu 6,1%, și Vărgăria, cu 5,9%. Isăchili spunu una adgheafuru cabaia mari, di trei puncti proţentuali, anamisa di România și media europeană, s-cl’eamă un ritmo anualu di creaştiri a păhadzloru cu multu pisti aţelu nreghistratu pi nivelu comunitaru.
Creaştirea tru cazlu ali Românie fu dimăndată ma ninti și di Institutlu Naţionalu di Statistică, cari spusi că rata anuală ali inflaţie criscu si tru meslu sumedru şi agiumsi la 6,9%, di la 6,6% tru yismăciuni. Valorli lişoru altă turlie anamisa di aţeali dauă instituții ari ună exighiseari aplo, ţi ţăni di metodologhii ahoryea, cari acaţă tu isapi alță indiţ.
UIdisitu cu Eurostat, la nivelu europeanu, ma scumpă cu 21 di proţenti andicra di idyea perioadă a anlui tricutu, energhia ma largu easti un factoru mari pritu zorea ţi u bagă tu arada a păhadzloru. Serviţiili avură și eali ună contribuție importantă, tru chirolu anda bunurli industriali nienerghetiţi și alimentili, alcoolu și tătumea avură contribuții ma n’iţ.
Tră populație, ţifrili macroeconomiţi si transpun tru ună realitate aplo: cu idyili păradz s-ancupără tut ma pţăni produsi și serviţii. Familiili cu venituri n’iţ suntu nai ma aguditi, di itia că ună parti ma mari ditu bugetlu a lor easti ahărdzitu ti alimenti, energhie, transportu și alti hărgi esențiali. Tru România, problema easti amplificată di vulnearabilitățli di năuntrulu ali economie, iarapoi dinăpoia a proţentiloru suntu miliun’i di oamin’i cari ş-apridună hărgili, tragu măna di la niscănti ancupărări și cilăstăsescu s-ţănă cheptu la ună custuseari a banăl’ei tutu ma mari.
Autor: Corina Cristea
Armânisearea:Taşcu Lala