Reglementări ti sânâtati
REGLEMENTĂRI TI SÂNÂTATI
Valentin Țigău, 30.01.2013, 11:10
REGLEMENTĂRI TI SÂNÂTATI
Tu Românii, Proiectul a contractului-cadru di apruchiari a asistenţâl’ei medicali intră tu moaubeti publicâ. Ministrul ali Sânâtati, Eugen Nicolăescu, dzâsi că va unâ largâ consultari, iu s-şi spunâ minduirili cât ma mulţâ reprezentanţâ a asociaţiilor di pacienţâ, asiguratori privaţ şi patronati. El spusi că, maca dupu bâgarea tu practico a contractului-cadru va s-mai hibâ catandisi iu lândziţl’ii va s-hibâ pitricuţ s-şi ancupârâ materiali icâ s-da aruşfeti ta s-poatâ s-intrâ tu spital, directorii aluştor spitali va s-hibâ scoşi dit ipotisi. Ministrul hâbârisi că va s-mai hibâ adrati audituri, iara directorii di spitali cari va s-adunâ borgi, pi trei meşi un dupu alantu, va s-hibâ şi ei scoşi dit ipotisi. Ministerlu ali Sânâtati va ca, tu estan, s-pâlteascâ mari parti dit borgili adunati tu aţei dit soni an’i di sistemlu medical.Tu ţi mutreaşti pâltearea deadun tu cazurli di internari, sistem ţi va s-intrâ tu practico la 1 di marţu, ministrul dzâsi că aestu lucru muteaşti pţân’I pâradz. Ama aestâ meatrâ a guvernului nu easti ici apruchiatâ di asociaţiili aţilor ţi suntu lândiţ. Coaliţia a Organizaţiilor a Pacienţilor cu Afecţiun’i Croniţi dit România pistipseaşti că ea easti contra a Nomlui di Sânâtati şi afecteadzâ pacienţâl’ii cu venituri n’iţ. Ma multu, angajamentul a executivului dinâintea a FMI-ului ta s-introducâ aestâ pâlteari deadun, s-poati s-nu hibâ unâ cu ţi dzâsi Nicolăescu tu ahurhita a anlui; ministrul spunea atunţea câ România nu easti etimâ s-treacâ la un altu sistem, care s-mutreascâ aestâ coplatâ. Şi Colegiul a Yeaţârlor s-spusi lâhtârsit di zborlu a caplui ali delegaţii FMI tu Românii, Erik de Vrijer, cari dzâţi ca aestâ pâlteari tu un loc lipseaşti s-hibâ di 10 lei (2,3 euro) pi dzuu, pi tut chirolu di internari. Colegiul spuni că oficialu FMI nu ari niţi unâ turlii di expertizâ tu ţi mutreaşti imnarea bunâ a sistemelor di sânâtati, iara, tu sinfuniili tu cari pripunearea lui va s-hibâ apruchiatâ, cama di 80% dintrâ român’i va s-aibâ cali câtâ serviciili dit spitali, maşi cu mări gaireţ. Multi dintrâ alâxerli a contractului-cadru di dari a asistenţâl’ei medicali suntu ligati icâ condiţionati di bugetlu di stat pi 2013, pitrcut câtâ mouabeti şi apruchiari tu Parlament. Proiectul mutreaşti 3,7 miliardi di lei ti pâltearea a borgilor şi 44 di milioani ti ancupârarea a aparaturâl’ei di performanţâ. Tu minduita a ministrului di resort, Eugen Nicolăescu, bugetul, ma mari ca anlu ţi tricu, n-aratâ ţi poati s-adarâ România, azâ, ca sânâtatea s-armânâ unâ prioritati, prot lucru ti mutreari.
