Pripuniri di alâxeari ali Constituţie
Roxana Vasile, 30.05.2014, 14:45
După doi meşi ş-giumitati di andamusi ş-moabeţ, Forumlu Constituţional — ţi adunâ tu el organizaţii ali suţiitati ţivilâ, cetăţeni, universităţ, specialişti, comunităţ locali – prideadirâ a Comisiil’ei Parlamentarâ tră Revizuirea ali Constituţie raportul ţi acaţâ tu isapi pripunirli a suţiitatil’ei ţivilâ mutrindalui alâxearea a nomlui di thimel’iu ali Românie. Eali lipseaşti s-hibâ la thimel’ilu a lucurlui faptu di Comisie, cari va s-ndreagâ unâ pripuniri leghislativă. Aestâ ari, ama, mână libiră ta s-acaţâ tu isapi icâ nu raportul adus aminti, pârâstisitu di prezidentul a Forumlui Constituţional, profesorlu Cristian Pârvulescu:
Tutu cu tut, noi avem pripuniri mutrindalui 7.000 di aliniati. Raportul a Forumlui ari cama di 300 di frândzâ. Prota parti easti unâ sintetizari a pripunirlor, 140 di frândzâ, iara a daua parti suntu pripunirli efectivi pi cari li aprukem, aţeali ţi putum s-li codificăm — cu alti zboarâ, a curi putum s-lâ dăm unâ formă niheam di niheamâ juridică. Suntu multi alti pripuniri cari nu eara ngrâpsiti tu unâ formă juridică şi cari suntu pârâstisiti tu conţinutlu a raportului. Forumlu Constituţional nu ndreapsi un proiectu di alâxeari ali Constituţie, nu aveam niţi unâ turlie di mandat tră aestâ. Nu adrăm altuţiva câ maşi s-câftăm minduita, s-adunăm pripunirli a cetăţen’ilor.
Acâ nu suntu imperativi, ti bunâ va s-hibâ câ pripunirli a suţietatil’ei ţivilâ s-nu armânâ tu vimtu, reprezentanţâl’ii a Forumlui câftândalui a politicien’ilor s-aibâ ngâtan ponderea-a lor tu nâscânti comati. Un dit lucârli nisimfunizati mutreaşti bicameralismul, ţi lu va, ma marea parti dit USL ama ş-dit UDMR. Democrat-libearalii dit opoziţie suntu maşi el’i gol’i atel’i ţi ndrupăscu bâgarea tu lucru a parlamentului unicamearal, acâ fu adrat un referendum ndreptu tu 2009. Deputata Raluca Turcan: Lipseaşti s-minduim tu aestâ gaereti tin’isearea a votlui ţi lu deadirâ cetăţen’il’i la referendum dimec parlamentul unicamearal, n’icşurarea numirlu di parlamentari. Dgheafurăi mări anamisa di partidi scoati tu migdani şi funcţionarea-a tripletâl’ei prezidentu-parlamentu-guvernu. Tu kirolu anda PDL u spuni vrearea ti ripublica semiprezidenţială, cu un prezidentu relativ vârtos, cum tora, UDMR u aleadzi aţea parlamentară, tu cari prezidentul s-hibâ aleptu di legislativ.
Ama bânâtorl’i s-pari că vor ta ş-aleagâ, ma largu, unâ turlie ndreptu/ directu, prezidentul, aşi că USL easti nolgica: unâ ripublică semiparlamentară tu cari legislativul ari nai cama multi pârghii, prezidentul easti ma largu aleptu direct, ama nu mata ari ici ţiva ti spuneari ti alidzearea a premierlui. Ma multu, USL va ta s-n’icşureadzâ mandatlu ti caplu a statlui. Co-prezidentul şi premier, Victor Ponta: Pripunirea a USL easti ta s-aibâ un mandat prezidenţial di 4 an’i şi ta s-aibâ neise, la cafi 2 an’i, unâoarâ alidzeri parlamentari, alantâoarâ/ unâoarâ prezidenţiale. Comisia Parlamentară tră Revizuirea ali Constituţie va s-ahurheascâ ntrâoarâ moeabeţli, ahtari turlie câ s-elaboreadzâ, până tu inşita a meslui cirişar, un proiectu di nom. Yini deapoa, arada, ti di vearâ, ti votlu tru Senat, deapoa, tu, yismâciuni, atel dit Cameara-a Deputaţlor şi, neise, referendumul, cari să s-ţânâ nai ma amânat tu ahuhrita a meslui brumar.
