Pruvdieri bugetari tră 2014
Unâoarâ ţi s-bitisira isăchili tră construcţia a bugetlui ti anlu ţi yini, varianta tricută di Executiv agiundzi tra s-hibă zburâtâ tu Parlamentu di Bucureşti. Nu easti ici un buget filotim, spusi ministerlu di Finanţe, cari adusi aminti, tru idyiul kiro, că va s-aibă crişteri di accize, iara bâgărli tu lucru a oamin’ilor la stat va s-hibâ ncgl’iţati, şi ma s-hibă vârâ ananghi va s-poatâ sâ s-facâ maşi cu vuluseri speţiali. Bugetlu easti adrat pi unâ ixiki di 2,2% dit PIB şi unâ crişteari economică tut di 2,2%.
Corina Cristea, 14.11.2013, 12:15
Unâoarâ ţi s-bitisira isăchili tră construcţia a bugetlui ti anlu ţi yini, varianta tricută di Executiv agiundzi tra s-hibă zburâtâ tu Parlamentu di Bucureşti. Nu easti ici un buget filotim, spusi ministerlu di Finanţe, cari adusi aminti, tru idyiul kiro, că va s-aibă crişteri di accize, iara bâgărli tu lucru a oamin’ilor la stat va s-hibâ ncgl’iţati, şi ma s-hibă vârâ ananghi va s-poatâ sâ s-facâ maşi cu vuluseri speţiali. Bugetlu easti adrat pi unâ ixiki di 2,2% dit PIB şi unâ crişteari economică tut di 2,2%.
Executivlu lugurseaşti că prit meatrili ţi s-loarâ va s-creascâ cu aproapea 5% amintatiţli la bugetlu di stat. Nai cama mulţâ di pâradz va s-hibâ ahârdziţ trâ Ministerlu a Dizvoltaril’ei Regionali şi ali Administraţie Publică, ama şi tră Ministerili a Fisil’ei, Finanţilor, Agriculturâl’ei şi Ministerlu tră Fonduri Europeani. Deapoa, şi bugetlu a Sănătatil’ei easti ma mari, iara un lucru ţi nâ hârseaşti easti că yiaţârl’i rezidenţâ va s-aibâ unâ creaştiri a tin’iilor di cafi mes. Tutunâoarâ, profesorl’ii debutanţâ va s-hibâ pâltiţ ma ghini. Ministurlu tră finanţi publiţi, Daniel Chiţoiu, cundil’e că impozitlu pi clădirli speţiali va s-hibâ di 1,5%, dimec statlu va s-poatâ s-adunâ dit aestâ taxă anvârliga di 500 miliun’i di lei:
Aestă impozitari a construcţiilor spetiali s-faţi tru tuti statili europeani, ama noi u aveam exceptată. Fortuma fiscală nu va s-creascâ cabaia. Tuţ sturl’i di electriţtati aduc şi alti amintatiţi andicra di activitatea di thimel’iu. Cafi un stur easti dat cu nike di companiile ţi âl’i au tu isapi cu 50 di euro tru mes tră companiili di telefonie mobilă, tră companiili di publiţitati. Dimec aesti construcţii speţiali aduc şi alti amintatiţi andicra di lucurlu di arada, di thimel’iu.” Opoziţia easti niifharistusitâ di algoritmul di ampărţari a pâradzlor, a deapoa aţel di ma nâinti ministru tră finanţi, democrat-libearalu Gheorghe Ialomiţianu, lugurseaşti că bugetlu tră 2014 easti ftoh. Gheorghe Ialomiţianu spusi trâ Radio România cum vrea lu ndridzea nâsu bugetlu:
Vrea s-dau pâradz tră investiţii tra s-fitruseascâ locuri di lucru şi vrea s-yineam cu meatri trâ n’icşurarea a contribuţiilor suţiali aţea turlie că mediul di emburlâchi s-apâdâseascâ pozitiv. Easti fără preţedentu tru România după 89, cându tuţ reprezentanţâl’ii a mediului di emburlâchi spun că s-bagâ problema tra s-fugâ dit România.” El cutugursi că bugetlu s-ntimil’eadzâ pi criştearea a taxilor şi a impozitilor, ama şi a accizilor, lucru ţi poati sâ scoatâ tu migdani unâ crişteari a pâhadzlor la produsi şi utilităţ. Tu minduita a ministurlui Liviu Voinea, ama, easti un buget ţi ari tu mengâ investiţii, dimec 6% dit PIB hiindalui ahârdziţ tră aesti.
Textul: Corina Cristea
Armânipsearea: Taşcu Lala
