Năulu guvernu Ponta
Apruchiat tora ayoniea di Parlamentu, Guvernul Ponta 3” poati ş-ahurheascâ programlu politic ti cari şi-luâ borgea. Suntu baia diferenţi andicra di guvernul Ponta 2”, dit Andreu 2012, ama tu legislativi nu suntu, cu tuti că executivlu di tora vini şi Uniunea Democratâ a Maghiarilor dit Românii tu loclu a liberalilor, cari s-deadirâ na-nâparti dupu niachicâserli ţi li avurâ cu soţial-democraţâl’ii. Ti yinitorl’ii doi an’i şi giumitati, cabinetlu dit cari mai adarâ parti, pi ningâ PSD şi UDMR, şi reprezentaţâ a Partidlui Conservator şi ali Uniunii Naţionalâ ti Progreslu ali Românii, va s-tin’iseascâ prinţipiili ţi şed la timeilu a bugetului apruchiat pi 2013: va s-ţânâ cota unicâ di impozitari di 16%, iara prit aţeali proti lucri ti adrari suntu n’icşurarea a taxilor di asiguripseri soţiali şi scutearea di la impozit a profitlui reinvestit.
România Internațional, 12.03.2014, 11:53
Apruchiat tora ayoniea di Parlamentu, Guvernul Ponta 3” poati ş-ahurheascâ programlu politic ti cari şi-luâ borgea. Suntu baia diferenţi andicra di guvernul Ponta 2”, dit Andreu 2012, ama tu legislativi nu suntu, cu tuti că executivlu di tora vini şi Uniunea Democratâ a Maghiarilor dit Românii tu loclu a liberalilor, cari s-deadirâ na-nâparti dupu niachicâserli ţi li avurâ cu soţial-democraţâl’ii. Ti yinitorl’ii doi an’i şi giumitati, cabinetlu dit cari mai adarâ parti, pi ningâ PSD şi UDMR, şi reprezentaţâ a Partidlui Conservator şi ali Uniunii Naţionalâ ti Progreslu ali Românii, va s-tin’iseascâ prinţipiili ţi şed la timeilu a bugetului apruchiat pi 2013: va s-ţânâ cota unicâ di impozitari di 16%, iara prit aţeali proti lucri ti adrari suntu n’icşurarea a taxilor di asiguripseri soţiali şi scutearea di la impozit a profitlui reinvestit.
Tu minduita a protlui-ministru Victor Ponta, easti aştiptatâ unâ n’icşurari cu 5% mutrinda pâradzl’ii daţ di angajator la asiguripserli soţiali, triţearea a taxâl’ei pi valoari adâvgatâ di la 24 iara la 19% şi unâ cotâ cama scâdzutâ la mâcărli di bază – ama tuti aesti, unâoarâ ţi cadrlu fiscal va s-da cali. Caplu a guvernului lâ dzâsi a parlamentarilor ca estan electoral s-nu s-arâdâ şi s-bagâ tu practico meatri di turlii populistâ. Victor Ponta: Tu 2014 s-nu nâ arâdem aşi cum adrăm tuţ tu 2009, s-criştem nivelu di aşteptări al poplui, s-nâ alumtăm cu promisiun’i şi dapaoaia s-avem un cutrembur”, un dezastru, aşi cum fu tu 2010.
Ama, pi di altâ parti, vag şi electoral îi-aspusi liderlu liberal Crin Antonescu a programlui a guvernului Ponta 3”: Unâ declaraţii, câ easti şi di prinţipii şi di intenţii a unui guvernu, lipseaşti s-dzâcâ lucri limpidz. Tora nu ştim maca va s-poatâ, şi cându va s-poatâ. “Maca va s-da cali cadrul bugetar” – Em, adarâ-ţâ cadrul bugetar, ta s-ti agiutâ ti tuti lucârli ţi li vrei. Ama liberal’ii hâbârisirâ câ nu va s-ahurheascâ vârâ o moţiuni di cenzurâ tora ayoniea. Pi di alantâ parti, Partidlu Democrat Liberal bitisi zboarâli.
Prezidentul Vasili Blaga: Cara lu mutritu premierlu, el maşi s-alumtâ s-promitâ lucri pţâni. Ie, va li adarâ tuti, maca va s-aibâ tutâ andruparea. Imnâ cum nu lipseaşti, icâ nu şi-adarâ unâ analizâ a tutulor resursilor ţi li ari. Tuti suntu cu “poati, vahi”. Democrat-liberalii nu adunarâ tuti simnâturli ca moţiunea a lor s-agiungâ trâ moaubeti tu Parlamentului fârâ andruparea a liberalilor, cari va s-aşteaptâ meslu Mai ta s-apufuseascâ ţi va s-adarâ.
