Romania, Ripublica Moldova si criza Ucraineana
La niti 48 di sihat di la simnarea, Moscova, a acordului prit cari hamunisia Crimeea ti easti ali Ucraina eara alikita di Federaţia Rusă, prezidentul ali Rip. Moldova (ex sovietică, majoritar românofonă), Nicolae Timofti s-andamusi, Iaşi, tru România, cu omologlu a lui di Bucureşti, Traian Băsescu. Subiectul printipal fu criza dit Ucraina şi consecinţili pi cari poati s-li aiba tra statili dit zonă. Rep.Moldova nu pricunuscu anexarea ali Crimeei şi considiră că acţiunea ali Rusie calca sertu ndreptul internaţional.
Valentin Țigău, 20.03.2014, 12:57
La niti 48 di sihat di la simnarea, Moscova, a acordului prit cari hamunisia Crimeea ti easti ali Ucraina eara alikita di Federaţia Rusă, prezidentul ali Rip. Moldova (ex sovietică, majoritar românofonă), Nicolae Timofti s-andamusi, Iaşi, tru România, cu omologlu a lui di Bucureşti, Traian Băsescu. Subiectul printipal fu criza dit Ucraina şi consecinţili pi cari poati s-li aiba tra statili dit zonă. Rep.Moldova nu pricunuscu anexarea ali Crimeei şi considiră că acţiunea ali Rusie calca sertu ndreptul internaţional.
Ca stat cari ari tru componenţă Transnistria, republică majoritar rusofonă autoproclamată ama nipricunuscuta di comunitatea internaţională, Moldova easti pi ndreptu tra s-hiba gailipsita tru ligatură cu una posibilă expansiune ali Rusie tra cundil’earea diznau sinurli a fostal’ei URSS; cu ahât ma multu, cu cât separatiştil’i transnistreni cafta intrarea tru componenţa ali Feraţie Rusa ama Duma di Stat di Moscova feati multi ori arada declaraţii di susţaneari a aistor nadii.
La conferinţa di presă di după andamusea tru kipita, Traian Băsescu sa spusi candasitu că expansiunea ali Rusie nu va s-dansaeasca la Crimeea. Tru context, Nicolae Timofti cafta ali UE stabilirea unal’ei calindari şi a unal’ei data-ţintă tra aderarea ali Rep.Moldova. Chişinaulu easti tru aestu momentu, tru etapa preliminară cu simnarea a Acordului di Asociere şi a atilui di Libira Schimb cu UE, cându dimersul favorabil ali Românie pi ninga instituţiile europene poati s-hiba di mari simasie.
Nicolae Timofti: “Lu placarsimu domnul prezidentu Băsescu să andrupasca, la nivelu ali UE, aestă vreari hirească, aestă voli ali Rep.Moldova. Na spusim punctili di videari tra conflictulu transnistrean. Intereslu a daulilor părţa, cata şi comunitatil’ei internaţionala, easti ca atmosfera tru zonă s-armână isiha, ama abordărli s-hiba constructive”.
Tru arada a lui, Traian Basescu cundil’e că soluţia ti asiguripsearea a securitatil’ei tra Rep.Moldova u reprezintă darea sila a proceselor di integrare europeană.
Traian Băsescu: “UE numata lipseasti s-hiba ciudusita. Cum na lo pri napandica cazlu ali Georgie, tru 2008, na lo pri napandica şi episodlu Crimeea 2014, ama UE lipseasti s-akicaseasca că semnalili cari vinira di cabaia kiro dit reghiune lipseasti s-hiba mutriti cu ngatan, că expertiza tra reghiune s-fati aoa, nu pi mealu alantu a Atlanticlui.”
Contextul reghional ndilicat, mintit, cafta orlea zorlea ali UE s-l’ia apofasi mplini di urayiu, ama ayun’iusearea a procesului di integrare a statilor ex-sovietite cari vor aestu lucru easti una ditru eale.
Armanipsearea: Tascu Lala
