Apofasi ocţidentali
Corina Cristea, 21.03.2014, 11:13
Andamusiţ Bruxelles, la Consiliu European di Primuvearâ, liderl’ii europen’i zburârâ maşi, tora di oarâ, ti ofiţialii aruşi icâ ucrainen’i ţi lipseaşti s-li’a înaduâ sancţiun’i dupu ţi ş-feaţirâ di lucru mutrinda triţearea ali Crimei la Arusii. Aesti sanţiuni mutrescu niscânti restricţii di vizi şi blocarea a averilor tu UE şi sunt idyea cu aţeali di cari adusi aminti di ma multi ori şi administraţia al Barack Obama. Moscova lipseaşti s-ţânâ calea a moaubetâl’ei — dzâţi şi Bruxelleslu, ama şi Washingtonul, dauli spunândalor că fârâ unâ soluţii di turlii politicâ, sectoarili-cl’eai ali icunumii arusâ pot s-aibâ problemi maca aestâ catandisi va s-iasâ dit mân’i. Îngl’iţarea a activilor şi niapruchiarea ta s-mai ducâ tu UE icâ SUA ti aţei ţi suntu aproapea di Vladimir Putin, nu îi aspâri multu pi aţei di Moscova, iara analişţâl’ii di Bloomberg pistipsescu că exporturli di cathi an di petrol şi gazi ali Arusii pot s-hibâ nai ma greauâ armâ a liderului di Kremlin ta s-ascapâ di aesti meatri.
Arusia easti nai ma marli producător di petrol dit lumi şi pitricu tu 2012 câtâ Europa şi SUA petrol, carburantu şi îngrăşăminti di turlii chimicâ di vârâ 160 di miliardi di dolari. Uidisit cu analişţâl’ii, un embargo pi aesti exporturi va s-aspargâ bugetlu arus, ama consumatorl’ii dit Europa pot s-chearâ ma multu, iara aestâ meatrâ nu va s-aibâ niţi vârâ efectu. Di oarâ, cancelarlu gherman, Angela Merkel, cari vigl’eadzâ nai ma marea icunumii europeanâ, dzâsi că Ghermânia – protlu soţ comerţial ali Arusiei tu Europa – easti etimâ s-alumtâ cu efectili icunumiţi ţi va li aducâ sanţiun’ili ti Arusii. UE apufusi s-amânâ summit-lu ţi lu-aştiptau Luni, la Moscova, ca reacţii andicra di triţearea ali Crimei la Arusii.
Evenimentili dit Ucraina agiutarâ pi di altâ parti, proţeslu di crişteari ali Uniuni Europeanâ. Bruxelleslu şi Kievlu simnarâ, la Consiliu European, îndauâ capitoli politiţi mutrinda Acordul di asocieri ali Ucrainâ la UE. Iara angrâpsearea a acordurilor cu Republica Moldova şi Georgia fu amânatâ di Bruxelles ti meslu Cireşar. Şi purtata al NATO mutrinda apruchiarea di năi membri s-poati s-alâxeascâ, dzâsi secretarlu general ali Alianţâ, Anders Fogh Rasmussen, câ ţe tora adarâ mări eforturi ta s-aproachi şi vâsâlii ca Bosnia şi Herţegovina, Macedonia, Muntenegru icâ Georgia. Aesti zboarâ yin dupu ţi, dzâţi ofiţialu NATO, triţearea ali Crimei la Arusii easti nai ma laia ameninţari mutrinda stabilitatea a Europâl’ei di la bitisirea a Polimlui Araţi ş-pânâ azâ.
