Agiutoari guvernamentali tra sinistraţ
Ploili, tru România, canda nu mata s-danasescu. După una iarnă ti avu tru nai cama marea parti xeri, cari pi turişti şi intreprinzători dit dumeni îl’i fătea, dimi, s-plângă ti ixichea a neaual’ei tru staţiun’ili di munti, a deapoa agricultorl’i să s-aspara că biricheatea va la hiba asparta, nicarli aduc, tora, problemi maxus tru sudlu a vasiliil’ei. Ahurhit stamana ti tricu, aprindu sărbătorli ti di Pasti, episodlu cu ploiurli s-lundzeaşte ti lahtarsearea maxus a atilor nai ma agudiţ di cantităţli cabaia mări ti cădzura ica di virsarea a nascantor arâuri. Asi cum spun meteorologil’i, timbihea faptă tra 11 di judeţi suditi şi sud-vestiti poati sa s-lundzeasca — cu una probabilitate di 90% — până viniri dicseara ica sâmbătă tahina.
Roxana Vasile, 24.04.2014, 12:09
Ploili, tru România, canda nu mata s-danasescu. După una iarnă ti avu tru nai cama marea parti xeri, cari pi turişti şi intreprinzători dit dumeni îl’i fătea, dimi, s-plângă ti ixichea a neaual’ei tru staţiun’ili di munti, a deapoa agricultorl’i să s-aspara că biricheatea va la hiba asparta, nicarli aduc, tora, problemi maxus tru sudlu a vasiliil’ei. Ahurhit stamana ti tricu, aprindu sărbătorli ti di Pasti, episodlu cu ploiurli s-lundzeaşte ti lahtarsearea maxus a atilor nai ma agudiţ di cantităţli cabaia mări ti cădzura ica di virsarea a nascantor arâuri. Asi cum spun meteorologil’i, timbihea faptă tra 11 di judeţi suditi şi sud-vestiti poati sa s-lundzeasca — cu una probabilitate di 90% — până viniri dicseara ica sâmbătă tahina.
Ploiurli, chiritlu şi aoa si aclo grindina, a deapoa si baterli a vimtului cu irusea di 50-60 di kilomeatri tru sihati, cata aestu easti tabloulu meteorologic tru aestu kiro tru locurli adusi aminti ma nsus, multi ditru eali hiindalui, aguditi s-tru dzalili di ma ninti, di cupan’ili mplini a araurlor cu api mari. Bucureşti, la Guvernu, comandamentul tra catastisi di ananghi s-anduna cafi dzuua. Vitepremierlu Liviu Dragnea la cafta a prefecţalor dit giudeţili ti au zn’ii s-pitreaca cât cama ntraoara planurli di lucru şi intervenţie tra locarli ti li lugursescu crititi, tra s-poata s-l’ia meatri cu hairi. Ma multu, tru minduita al nasu, primarl’ii lipseasti s-hiba protl’i cari s-aiba ligătura cu cetăţean’il’i a curi casi pot s-hiba zn’iipsiti.
Ia ti spuni Liviu Dragnea: Vă placarsescu s-la dat borgi a primarlor, vă placarsescu să-l’i mintits salami tru aesti acţiuni. Easti di simasie tra cathi cetăţean s-ducheasca ca nu armasi niacatat tru isapi si vigl’eatu di autoritatli locali, prota s-prota, di autoritatli giudeteani şi, ma largu di autoritatli a aistei vasilie. Cilastasits ma largu asi cum u feaţit până tora, tru un astreas lucru deadun cu tuti instituţiile a Comitetlui giudeţean tra catastisi di ananghi. Bucureşti aveţ discl’ideari tra iti turlie di agiutor ti lu caftaţ. Ma s-hiba ananghi, tuti structurli specializati a Ministerlui di Interne suntu hazari tra s-l’ia meatri, nica si cu purtarea a oamin’ilor, mutarea a lor tru locari uidisiti şi apanghisearea a lor până va s-ndreaga catastisea.
Tra s-nu s-agiunga la nai drami, după oamin’il’i ti chirura stamana ti tricu, autoritatli fac cl’imari la banatorl’i dit locurli cu piricl’iu s-nu acata calea a apilor. Tru giudeţlu Teleorman, nai cama agudit di nicarli di până tora — cu 27 di localităţ sum api, n’il’i di ictari di agari şi suti di nicuchirati zn’iipsiti — Guvernul apufusi, tru andamusea di n’ercuri, tra s-da 53 di miliun’i di lei, ti va s-dzaca aproapea 12 miliun’i di euro, tra lucrări di ananghi tra s-nu s-agiunga diznau la zn’iipseri si s-hiba ndreapti zn’iili di furn’ia a fanicolui cu fisea ti s-feati meslu aestu.
Armanipsearea: Tascu Lala
