Giustiţii şi aruşfeti
Adrian Năstase pârea, tu bitisita a anlui 2004, dupu 4 an’i di cumândiseari a guvernului şi a nai ma marilui partid dit Românii, PSD, s-nu-l dânâseascâ canâ tu alumta lui ti ipotisea di prezidentu. Ama aestu dit soni nu amintă doilu tur dinâintea al Traian Băsescu.
România Internațional, 22.08.2014, 12:23
Adrian Năstase pârea, tu bitisita a anlui 2004, dupu 4 an’i di cumândiseari a guvernului şi a nai ma marilui partid dit Românii, PSD, s-nu-l dânâseascâ canâ tu alumta lui ti ipotisea di prezidentu. Ama aestu dit soni nu amintă doilu tur dinâintea al Traian Băsescu.
Saga a lui giudiţiarâ ahurhi dupu aţel lai chiro ti el. Fu câftat tu trei dosari greali di aruşfeti. Tu dauâ di eali, fu pitricut la hapsi, ti luari di pâradz ti campania a lui electoralâ dit 2004, ama ş-ti luari di pâradz ţi nu-i lipseau.
Aesti lucri furâ tu chirolu a lui guvernamental, unlu bun tu ţi mutreaşti proţeslu di integrari europeanâ ali vâsâlii, ama aspartu di greali câbăţ di aruşfeti. Pideapsa dit 2012 fu unâ premierâ di turlii istoricâ ti Românii. Năstasi eara protlu ofiţial analtu dit chirolu postcomunistu cari eara pitricut la hapsi cu executari
. Dupu el vinirâ ş-alţâ demnitari, iara giustiţa dit Românii, a curi îi si adusi câbati multu chiro câ ţe nu adarâ lucurlu cum lipseaşti, pârea s-hibâ ayoriea di mecanismul politic ţi îi avea summinatâ independenţa. Cu condamnarea al Adrian Năstase ahurhea un nău chiro.
Năstase dzâsi totna nu ari niţi câbati ş-că easti maşi victima politicâ a aţilui di tora prezidentu, Traian Băsescu, hiindalui vidzut di adversari ca un om arâzbunâtor, ţi cumândiseaşti tuţ procurorl’ii. Tu idyul chiro, ama, Adrian Năstase fu, ti magistraţl’ii di la Curţea Supremâ, un simbol di aruşfeti politicâ la nivel analtu. Pitriţearea a lui tu hapsi fu multu zburâtâ, iar xen’ii vidzurâ aestâ apofasi ca hiindaei un semnu di maturitati, di crişteari a statlui di îndreptu.
Pi di altâ parti, “moda” ahurhitâ di Năstase cari mutrea aspârdzearea a imaginâl’ei al Traian Băsescu acâţă la public. Prezidentul ţi adră PC, marli embur Dan Voiculescu, pitricut veara aestâ la 10 an’i di hapsi ti furn’iea că la pâradz, s-aspusi ş-el victima a prezidentului. Tu îndauâ zboarâ anyrâpsiti pi bloglu a lui, Voiculescu apruchie scutearea condiţionatâ dit hapsi al Adrian Năstase, ama nu agârşi s-spunâ că român’ii bâneadzâ, tu minduita a lui, tu unâ dictaturâ, ţi s-aproachi di bitiseari.
Câbatea ţi îi si aduţi al Băsescu, că îi cumândiseaşti pi ascumta pi procurori, pari s-hibâ, ama, di hazi, tu sinfuniili tu cari fratili a lui ma n’ic, easti şi el încl’is ti trafic di influenţâ.
