Republica Moldova şi Evropa
Ningâ Ucraina, apustusitâ di polim, unâ altâ vâsâlii ţi fu sovieticâ ma ninti, easti bun pol di stabilitati şi isturii di mari sucţes a Parteneriatului Estic ahurhit di Uniunea Europeanâ – ama, nu tuti lucârli imnâ cum lipseaşti tu Republica Moldova, ti cari easti zborlu.
România Internațional, 02.09.2014, 11:45
Ningâ Ucraina, apustusitâ di polim, unâ altâ vâsâlii ţi fu sovieticâ ma ninti, easti bun pol di stabilitati şi isturii di mari sucţes a Parteneriatului Estic ahurhit di Uniunea Europeanâ – ama, nu tuti lucârli imnâ cum lipseaşti tu Republica Moldova, ti cari easti zborlu.
Aclo, oamin’ii nica s-alumtâ cu urfân’ia şi aruşfetea, iara regiunea separatistâ proarusâ, Transnistria, easti, di mai ghini di 20 di an’i, inşitâ di sum cumândisearea a autorităţlor ţentrali – giumitatea di stânga, comunistâ şi soţialistâ, a Parlamentului pari s-hibâ cumândisitâ di Moscova. Ama, guvernatâ, dit anlu 2009, di unâ suţatâ pro-ocţidentalâ, Republica Moldova s-ţânu pi cicioari ş-amintâ s-gioacâ cum lipseaşti cartea mutrinda integrarea europeanâ şi adunâ tora tuti poamili a curagiului cu cari bâgă tu practico meatrili cari s-u aproachi di ligâturlili comunitari.
. Dupu bitisearea, tu meslu Cireşar, a acordului di suţatâ şi libirâ alâxeari cu UE, Republica Moldova s-hârsi di un nâu zbor di andrupari di la partenerl’ii ocţidentali. Minişţrâl’ii di Externi dit tuti vâsâliili membri ali Uniuni s-andamusirâ, Luni, ti naua oarâ, tu Gruplu ti Acţiunea Evropeanâ a Republicâl’ei Moldova.
Andreaptâ sum prezidenţil’ia ali Românii şi ali Franţâ, andamusea nu fu, poati aşi cum eara aştiptatâ, Bruxelles icâ Luxemburg, ama la iniţiativa a caplui ali diplomaţii di Bucureşti, Titus Corlăţean, Chişinău. Aşi, aestu dit soni dzâsi: Uniunea Evropeanâ easti cu mari bâgari di oarâ, maxus că ş-luă borgea s-andrupascâ Republica Moldova tu proţeslu internu di meatri cari caftâ s-adarâ unâ soţietati cama bunâ, cu un sistem susto di valori di turlii politicâ, democraticâ şi icunumicâ ali Uniuni Evropeanâ, ama şi unâ banâ cama bunâ ti cathiun dit cetâţen’ii aliştei vâsâlii.
Ministrul di Externi a Republicâl’ei Moldova, Natalia Gherman, exiyisi ş-ea: Zburăm, cu tuţ soţl’ii a mei dit vâsâliili membri UE, andicra di turliili limpidz prit cari statlu a nostu poati s-hibâ andrupât cama multu mutrinda scupadzl’ii tu Acordul di Suţatâ şi maxus tu intrarea pi pâzarea internâ ali Uniuni.
Hiindalui ş-el Chişinău, comisarlu evropean ti Extinderi, Ştefan Füle, adusi câbati, ama nu para limpid, ali Arusii, aţea ti cari zburâ di “presiun’ili paranom di partea a statlui mari dit Estu” şi dzâsi, tu îndauâ zboarâ, aţea ţi caftâ Bruxelles: “s-adrăm unâ Moldovâ independentâ şi un soţ cu puteari ali Uniuni Evropeanâ.”
