Pensii, indemnizaţii, salarii
Tu unâ adunari mutrinda alâxearea a sistemlui di pensii privati obligatorii dit Românii, ministrul român a Lucurlui, Rovana Plumb, dzâsi că Guvernul adarâ unâ analizâ sistemlui di tora, cu asistenţa a Bancâl’ei Mondialâ.
România Internațional, 14.10.2014, 12:26
Tu unâ adunari mutrinda alâxearea a sistemlui di pensii privati obligatorii dit Românii, ministrul român a Lucurlui, Rovana Plumb, dzâsi că Guvernul adarâ unâ analizâ sistemlui di tora, cu asistenţa a Bancâl’ei Mondialâ.
Autorităţli ştiu problemili di sustenabilitati pi chiro lungu a sistemlui di pensii di stat, spuni ministrul Rovana Plumb, tu minduita a curi aestu dit soni lipseaşti s-hibâ andreptu disnău, reformat.
Tut ea dzâţi că executivlu nu va s-alâxeascâ sistemlu a pensiilor privati obligatorii — doilu stâlpu di pensii — şi că, tora, tu cabinet s-lucreadzâ la pilonlu patru, aţel a pensiilor ocupaţionali. La idyea adunari, consilierlu a guvernatorlui BNR, Adrian Vasilescu, trapsi atenţia a autorităţlor şi ali societati civilâ că lipseaşti educaţia tu rândul a poplui tu ţi mutreaşti beneficiili a pensiilor privati.
Tu România aluştor dit soni an’i, adâvgă el, efectul a investiţiilor dit sistemlu a pensiilor privati fu duchit la nivel macro-icunumic şi va s-aibâ efecti buni pi chiro lungu.
Datili ofiţiali aratâ că, tu bitisita aluştui an, numirlu a salariaţlor cu contracti di lucru, aproapea 5.280.000, va s-agiungâ s-hibâ idyul cu numirlu a pensionarilor. Aestu lucru câ ţe, pi di unâ parti, nu mai furâ valuri di pensionări antiţipati – legitimi tu momentili di restructurari icunumicâ – şi că nu mai furâ alti restructurări tu administraţii – maxus tu sânâtati şi tu educaţii.
Creaşti, tu idyul chiro, vârsta di pensionari, cari va s-hibâ isa, ş-ti bârbaţ, ş-ti mul’ieri, tu anlu 2030, aşi cum ş-luă borgea România la nivel european. Uidisit cu nâscânti studii, unâ pensii decentâ lipseaşti s-hibâ, tu Romănii, 80 tru sutâ dit nivelu a salariului mediu pi icunumii, icâ vârâ 1500 lei, ama nivelu a ei di tora agiundzi maşi la 844 lei.
La moaubetea mutrinda pensiili, fu zburâtâ şi ideea ca, tu yinitorl’ii doi an’i, salariili a bugetarilor s-creascâ cu pânâ la 30 tru sutâ. Premierlu Victor Ponta dzâţi, ama, că ti Guvernu, protlu lucru ti adrari easti criştearea, di la 1 di Brumar, a alocaţiilor di stat ti ficiuriţl’ii dit fumeilii ţi u duc greu şi dublarea ali alocaţii di mâcari ti ficiuriţl’ii instituţionalizaţ.
Cu tuti aesti perspectivi, sistemlu a asiguripserilor soţiali dit Românii armâni unlu complicat. Maşi tu aeşţâ dit soni dzaţi an’i, nomlu a pensiilor fu alâxit di 70 di ori.
Specialişţâl’ii dzâc că alâxerli ţi lipsescu, suntu structurali şi nu suntu agiutati di instrumentili di gestiuni a unui sistem di pensii. Aşi, ta s-asiguripseascâ un sistem di pensii uidisit, pi chiro lungu, lipsescu avansuri tu ţi mutreaşti productivitatea a lucurlui, crişterea a ratâl’ei di ocupari a cetăţen’ilor activi, ama şi politiţ atactivi di imigraţii.
