Meatri mutrinda sistemlu di pensii
Guvernul di stânga di Bucureşti, iu PSD gioacâ rolu a primadonâl’ei, s-pari că nu easti ici armas, apustusit, ş-poati s-da agiutoari di turlii soţialâ ti baia categorii di oamin’i cu problemi.
România Internațional, 24.10.2014, 11:22
Guvernul di stânga di Bucureşti, iu PSD gioacâ rolu a primadonâl’ei, s-pari că nu easti ici armas, apustusit, ş-poati s-da agiutoari di turlii soţialâ ti baia categorii di oamin’i cu problemi.
Tu marli pachet soţial aflăm, prit alti lucri, criştearea a salarului minim brut pi icunumii cu vârâ 10%, pânâ la 975 lei, icâ aproapea 220 di euro, criştearea a indemnizaţiilor ti persoanili cu handicap cu 16 proţenti şi criştearea di dauâ ori ali alocaţii di andrupari ti 500 di n’ii di ficiuriţ dit fumel’i cu amintatiţi n’iţ. Crişterea a sumilor ti fciorl’ii dit plasamentu şi dublarea a alocaţiilor di mâcari ti ficiuriţl’ii instituţionalizaţ icâ ti cari au angâtan asistenţâl’ii maternali şi dublarea a alocaţiilor di cathi dzuâ ti mâcari ti adulţâl’ii cu dizabilităţ suntu, şi eali, meatri ţi va s-hibâ bagâti tu practico.
Iara ca semnu că executivlu caftâ s-da agiutor ti tuti aţeali di ma-nsus, niţi pensiili nu furâ agârşiti. Aşi, dzâsi ministrul a Lucurlui şi ali Protecţii Soţialâ, Rovana Plumb, cabinetlu dit cari adarâ parti, va s-bagâ tu practico, di la 1 di Yinaru 2015, apofasea a Curtâl’ei Constituţionalâ mutrinda calcularea disnău a pensiilor. Tu zboarâ concreti, numirlu aţilor ţi va s-hârseascâ di calcularea disnău a pensiilor, easti iuva la 240 di n’ii, iara pâhălu mediu di crişteari easti 400 di lei (vârâ 90 di euro), dupu bâgarea tu practico a coeficientului di corecţii.
Ama, criştearea dealihea va s-hibâ ş-ma mari, câ ţe aesţâ dit soni va s-agiutâ ş-di apofasea a executivlui prit cari tuti pensiiili va s-creascâ cu 5% tu anlu 2015. Pi di altâ parti, dzâţi ministrul, autorităţli va s-da cali la reintegrarea pi pâzarea a lucurlui prit darea a aşi-dzâslui amintatic minim di inserţii, ţi lipseaşti s-includâ amintaticlu minim garantat, alocaţia di andrupari ali fumeal’i şi agiutorlu di îngâldzari.
Cu detalii, ministrul Rovana Plumb: ”Prit bâgarea tu practico a amintaticlui minim di inserţii, vrem ca aestu amintatic minim garantat s-agiutâ oamin’ii ta s-intrâ pi pâzarea a lucrului, maxus că aestu dit soni nu va s-mai hibâ scâdzut dit salarlu pi cari el va lu aibâ, chiola va s-hibâ ziler, icâ va s-aibâ un contractu individual di lucru pi un chiro nideterminat icâ determinat. Agiutăm şi yinim cu motivaţia mutrinda intrarea disnău pi pâzarea a lucurlui.”
Tu ţi mutreaşti aesti agiutoari, la cari s-adavgâ ş-alti, cum easti n’icşurarea a CAS cu 5% la angajator, scutoarea a ma multor taxi şi impoziti icâ achicâsearea fiscalâ ti niscânţâ pensionari şi niscânti mami, s-luarâ apofasi tu aeşţâ dit soni meşi.
Că meatrili va s-intrâ tu practico tu un an electoral, tu cari miza a alidzerlilor prezidenţiali dit Brumar easti unâ multu mari, poati s-treacâ – ti aţei ţi nu suntu anviţaţ cu imnarea a lucârilor tu România post-comunistâ — maşi ca unâ goalâ coincidenţâ.
