Inflaţii şi buget
Tu aesti dit soni stâmân’i, Guvernul di Bucureşti pitricu ma multi hâbări mutrinda crişterli a amintatiţlor.
România Internațional, 07.11.2014, 12:19
Tu aesti dit soni stâmân’i, Guvernul di Bucureşti pitricu ma multi hâbări mutrinda crişterli a amintatiţlor.
Pensiili va s-creascâ ahurhinda cu 1 di Yinaru 2015. Idyea ş-tu ţi mutreaşti salariili a personalului dit sistemlu sanitar, pâradzl’ii ti ficiuriţl’ii instituţionalizaţ icâ ti auşl’ii dit centri andreapti ayoriea ti ei.
Tuţ aeşţâ pâradz va s-aflâ pi lista a hârgilor di anlu ţi yini. Cum şi di iu? Calendarlu electoral zorlea câftat di alidzerli prezidenţiali nu deadi cali nica, la unâ schiţâ di buget pi anlu 2015, ti anvirinarea ali opoziţii di dreapta cari aduţi câbati a Guvernului di tora, soţial-democrat, di lipsa a viziunâl’ei.
Tu un interviu ti Radio România Actualităţ, ministurlu a finanţilor, Ioana Petrescu, vini cu-ndauâ exiyiseri cari s-nu aproachi aesti dit soni câbăţ: Proiectul di buget pi anlu 2015 va s-hibâ lucrat deadun cu Fondul Monetar tu ahurhita a meslui Andreu, la nivel tehnic. El va s-hibâ bâgat tu practico di posibilu nău guvernu şi di posibilu nău premier, nai ma ayoniea tu Yinaru 2015 şi aestu lucru, câ ţe Fondul Monetar caftâ s-yinâ tu misiuni ofiţialâ tu protlu mesu dit 2015
Prim-viţeprezidentul PDL, Cătălin Predoiu, dzâţi, pi di altâ parti, că guvernul amânâ prezentarea tu Parlamentu a bugetlui, ta s-asumdâ problemili ţi vinirâ diunâoarâ cu tâl’iarea a investiţiilor. Prin scutearea a investiţiilor di stat, a investiţiilor guvernamentali dit buget şi dit politiţilii icunumiţi a guvernului, la un nivel minim, s-aspardzi iţi şansâ di crişteari icunumicâ tu anlu 2015.
N’icşurarea a investiţiilor publiţi easti unlu dit factorl’ii ţi pimsirâ Comisia Europeanâ s-revizuiascâ câtâ-nghios prognoza di crişteari icunumicâ ali Românii, ţi nu va s-treacâ di 2% tu inşita al 2014. Unâ ahtari meatrâ dusi la scâdearea a criştearâl’ei icunumicâ — dzâţi şi guvernatorlu a Bancâl’ei Naţionalâ ali Românii, Mugur Isărescu, tu minduita a curi poati s-aibâ, ama, şi un reversu bun: anamisa di meatri contra a aruşfetâl’ei şi a evaziunâl’ei fiscalâ, poati s-hibâ un semnu ti eficientizarea a hârgilor di turlii publicâ, tu sinfunii tu cari alumta contra-aruşfeti nu easti maşi unâ problemâ di moralitati, ama ş-di eficienţâ icunumicâ.
Şi tut dit partea a Bancâl’ei Naţionalâ ali Românii vinirâ hâbări buni tu ţi mutreaşti inflaţia. Uidisit cu nâscânti calculi, aestâ dit soni lipseaşti s-scadâ di la 2,2 la 1,5% estan şi di la 3 la 2,2% anlu ţi yini.
