Parlamentul şi antiarusfetea
La imaginea mplina di arina pi cari u ari Parlamentul di Bucureşti, altaturlie, una instituţie di thimel’iu tru arhitectura a Statlui român post-comunistu, cilastasira işişi aleptal’i. Di multi ori aeşta u ratara furn’ia tra sa u promoveadza tin’ia politică şi, maxus, morală, tru una vasilie tru cari arusfetea feati şi ma largu fati ravagii, em tru marea administraţie centrală, em atea locală. Simpla existenţă a imunitatil’i parlamentara, a curi societatea tivilă şi presa al’i alichira un superlativ cu vazi — super-imunitate -, ica nivrearea tra curmarea a aistei tru cazlu a aleptalor a curi la fura discl’isi dosari penali suntu asociate cu idheea că ingerinţa a aleptalor tru actul di justiţie s-feati nica si fara pirde. Cu tuti aesti, politicien’il’i nu danasira masi la prevenţie. Avea ananghi şi di nomlu cari să-l’i agiuta post-factum pi maratl’i şi mulţal’i a lor sot ti agiumsira tru hapsani.
Florentin Căpitănescu, 19.11.2014, 13:15
La imaginea mplina di arina pi cari u ari Parlamentul di Bucureşti, altaturlie, una instituţie di thimel’iu tru arhitectura a Statlui român post-comunistu, cilastasira işişi aleptal’i. Di multi ori aeşta u ratara furn’ia tra sa u promoveadza tin’ia politică şi, maxus, morală, tru una vasilie tru cari arusfetea feati şi ma largu fati ravagii, em tru marea administraţie centrală, em atea locală. Simpla existenţă a imunitatil’i parlamentara, a curi societatea tivilă şi presa al’i alichira un superlativ cu vazi — super-imunitate -, ica nivrearea tra curmarea a aistei tru cazlu a aleptalor a curi la fura discl’isi dosari penali suntu asociate cu idheea că ingerinţa a aleptalor tru actul di justiţie s-feati nica si fara pirde. Cu tuti aesti, politicien’il’i nu danasira masi la prevenţie. Avea ananghi şi di nomlu cari să-l’i agiuta post-factum pi maratl’i şi mulţal’i a lor sot ti agiumsira tru hapsani.
Ase, tru sertarili di la Camera a Deputaţlor di Bucureşti s-arihatipsi controversatlu proiectu a Nomlui tra amnistie şi graţieri, adoptat aproapea, aoa si un an di dzali, tru un secret absolut, di Comisia Juridică a forlui. Tas tora, tru havaia a dezbaterlor dit campania electorala tra funcţia di cap a statlui, Cameara lu ncl’isi tra totna nomlu, ca arod a unei solidaritati rarisima anamisa di aleptal’i a Putearil’ei şi atel’i ali Opoziţie. Proiectul pruvidea amnistierea a infracţiunilor, nica si a atilor asociate cu arusfetea, tra cari Codlu Penal ica nomurli spetiali baga una pideapsă cu hapsanea di până la şapti an’i di dzali şi graţierea acutotalui a pideapsilor cu hapsanea di până la şasi an’i. Liberalu George Scutaru, reprezentantul ali Opoziţie di centru-dreapta, u stipseasti majoritatea parlamentară, ncap cu PSD (numirlu una la guvernari), că lu ţanu maxus documentul tru aştiptari. George Scutaru:
”Fu ananghi s-yina oara s-chireţ alidzerli prezidentiali tra s-lu adutet tru arada di lucru tru Camera a Deputaţlor şi tra s-lu ncl’idet tra totna. Ti buna va s-hiba ca ş-tru yinitor, atumtea cându aveţ semnale di partea ali Opoziţie, di partea ali societati, s-li acaţaţ tru isapi”.
Al’iumtrea, parlamentarlu social-democrat Marian Neacşu spuni că aestă perioadă fu ananghi tra formularea a unui raportu cari s-aduca limbidzari dit partea ali Comisie Juridica. Marian Neacşu:
”Tru oara tru cari vrei s-promovedz un nom, cari adusi multu di multu interes dicât al’i si cadea dinintea a român’ilor, easti importantu s-esta ghini documentat şi s-poţ s-l’eai nai cama corectă şi nai cama bună apofasi. Nu lipsea s-hiba ufilisitu niti di dumnil’eavaostra şi niti di noi aest lucru ca una halati electorala”. Tut marţa, ca semnu ti invalideadză oportunitatea a Nomlui tra amnistie şi graţieri, plenlu di la Camera a Deputaţlor apruche caftarea a procurorlor tra s-nu aiba imunitati tru cazlu a trei alepta stipsit di arusfeti.
Armanipsearea: Tascu Lala
