Moeabet mutrindalui Codlu electoral
Tru Comisia di Cod electoral dit România ahurhira consultărli, la cari l’ia parti reprezentanţl’i a tutulor partidilor parlamentari, ti suntu ndrepţa s-facă pripuniri di alaxeari a nomurlor electorali. Până tora, membril’I ali Comisie featira isapi tra printipiili di thimel’iu mutrindalui alidzearea a prezidentului ali Românie, a deputaţlor şi senatorlor, ama şi tra alidzearea a autorităţlor locale. PSD, la guvernare, spusi că va s-pripuna, ntra altili, n’icsurarea a numirlui di parlamentari, vahi la 300 – la Camera a Deputaţlor şi la 100 – la Senat.
Valentin Țigău, 19.01.2015, 11:28
Tru Comisia di Cod electoral dit România ahurhira consultărli, la cari l’ia parti reprezentanţl’i a tutulor partidilor parlamentari, ti suntu ndrepţa s-facă pripuniri di alaxeari a nomurlor electorali. Până tora, membril’I ali Comisie featira isapi tra printipiili di thimel’iu mutrindalui alidzearea a prezidentului ali Românie, a deputaţlor şi senatorlor, ama şi tra alidzearea a autorităţlor locale. PSD, la guvernare, spusi că va s-pripuna, ntra altili, n’icsurarea a numirlui di parlamentari, vahi la 300 – la Camera a Deputaţlor şi la 100 – la Senat.
PNL, tru opoziţie, va s-pripuna, tru arada a lui, un sistem mixtu tra alidzearea a parlamentarlor. Ministurlu delegat tra ligatura cu Parlamentul, Eugen Nicolicea, cundil’e, tru un interviu, că va s-pripuna ali Comisie prota s-prota misurarea a banatorlor di tu xinatati cu ndreptu di vot, tra organizarea tin’isita a secţiilor. ‘Una s-una ti va s-baga tru lucru nomlu, spusi Nicolicea, ti un chiro di şasi mesi, roman’il’i dit xinatati va s-dimanda a ambasadilor că suntu aclo; deapoa, va s-adara secţii di votari ti s-hiba duri tra alegători.’
Alaxearea a atilor trei nomuri easti un lucru di amprotusa tra sesiunea parlamentară cari ahurheasti tru meslu scurtu, declara şi prezidentul ali Comisie tra elaborarea a Codlui electoral, Valeriu Zgonea. Senatorl’i şi deputaţl’i dit Comisia comună caftara, ma ninti, a Birourlor permanenti ca tuti proiectili di nom mutrindalui alidzerli s-hiba pitricuti la Comisie tra s-li faca moeabeti, a deapoa până tru 15 di martu, va s-poata s-dipuna amendamenti la proiectili existenti. El spuni că easti ananghi tra asiguripsearea a unui sistem di vot hairlatic şi securizat tra cathi cetăţean.
Valeriu Zgonea: ‘Tuti partidili polititi şi spusira vrearea prit consens ca sistemlu ti va lu pripunem prit proiectul di nom s-lucreadza fără niti una turlie di problemi loghistiti, a deapoa tuţ român’il’i, iu ti s-hiba, s-poată s-ufiliseasca elefter ndreptul ti thimel’iu tra vot. Tuţ him simfun’I că lipseasti s-n’icsuram numirlu di deputaţ şi senatori. Easti una lugurie ti u apruchem şi va s-aflam nai cama buni cearei, atea turlie câ Parlamentul s-hiba ma aretcu dit videala a mandatilor cari va li pripunem tra alidzeari ti cetăţean’il’I ali Românie tru 2016.
Una alaxeari di thimel’iu tu ligatura cu votlu tra român’il’i dit xinatati fu ananghisita sa s-faca după evenimentili dit brumar 2014 cându, multa cetăţean’i nu putura s-voteadza la alidzerli prezidentiale di furn’ia a ixichilor di sistem şi a slabal’ei organizari tu arada a proceslui electoral.
Armanipsearea: Tascu Lala
