Declaraţii mutrinda independenţa ali giustiţii
Pitricut tu giudicatâ ti acti psefti sum anyrâpseari privatâ, agiutor la evaziuni fiscalâ şi lari di pâradz t-un dosar mutrinda anyrâpsearea a nâscântor contracti di asistenţâ giuridicâ la companiili energhetiţi Turceni şi Rovinari (Sud), premierlu soţial-democrat Victor Ponta s-duţi ninti sâ ş-aspunâ lipsa di câbati şi s-nu aproachi niţi câbăţli ţi îi li aduc procurorl’ii, ş-niţi câftărli a prezidentului ta s-iasâ di pi ipotisi.
Corina Cristea, 25.09.2015, 13:10
Pitricut tu giudicatâ ti acti psefti sum anyrâpseari privatâ, agiutor la evaziuni fiscalâ şi lari di pâradz t-un dosar mutrinda anyrâpsearea a nâscântor contracti di asistenţâ giuridicâ la companiili energhetiţi Turceni şi Rovinari (Sud), premierlu soţial-democrat Victor Ponta s-duţi ninti sâ ş-aspunâ lipsa di câbati şi s-nu aproachi niţi câbăţli ţi îi li aduc procurorl’ii, ş-niţi câftărli a prezidentului ta s-iasâ di pi ipotisi.
Moaubeţli pe aestâ temâ par s-hibâ baia largu di bitiseari. Ahât chiro cât Victor Ponta armâni caplu a Guvernului, vâsâlia poati s-aibâ problemi, dzâsi procurorlu-şef al DNA, Laura Codruţa Kovesi, câlisitâ t-unâ emisiuni la un post privat di televiziuni.
Kovesi exiyisi că tu dosarlu tu cari premierlu fu pitricut tu giudicatâ, Complexul Energetic Oltenia nu s-adră parti ţivilâ câ ţe easti sum cumândisearea a Guvernului, deci, implicit a protlui-ministru tu ipotisi. Laura Codruţa Kovesi: Nu easti protlu dosar tu cari unâ instituţii publicâ easti cumândisitâ di omlu cari easti pitricut tu giudicatâ ca inculpat şi avem aestâ problemâ, că instituţia nu s-adarâ parti ţivilâ tu dosar. Andicra di magistraţ, cari tu chirolu cându suntu pitricuţ tu giudicatâ suntu şi scoşi di pi ipotisi şi nu mai pot ş-adarâ lucurlu di ninti, minduiescu că idyul nom lipseaşti bâgat tu practico ş-ti alanţâ funcţionari dit instituţiili publiţi.
Tu idyul chiro, şefa DNA zburâ ş-ti câbăţli psefti, uidisit cu zboarâli a ei, adusi di premier, icâ aţeali că el fu pitricut tu giudicatâ prit influenţi di turlii politicâ. Tu unâ intervenţii telefonicâ la un altu postu particular di televiziuni, Victor Ponta alasâ s-achicâseascâ aţea că prezidentul Klaus Iohannis ari bâgatâ zori tu aestâ catandisi: Mini mi antreb maca nu dumnia a lui bâgă zori ca mini s-escu pitricu tu giudicatâ, câ ţe deja aesti zboarâ nu-n’i si par normali dit partea a unui prezidentu ali Românii.
Caplu a statlui avea dzâsâ ninti că triţearea ali moţiuni di cenzurâ pi cari opoziţia liberalâ u ahurhi poati s-andreagâ unâ problemâ mari cu cari România s-alumtâ, aţea că ari un prot-ministru pitricut tu giudicatâ. Noi, la nivelu a Administraţil’ei Prezidenţialâ nu câftăm s-adram ping-pong cu mingii psefti, câ ţe avem lucru ti adrari. Maca domnul Ponta nu easti sigur tu ţi mutreaşti independenţa ali giustiţii, poati s-ducâ la Inspecţia Giudiţiarâ, apânghisi caplu ali Cancelarii Prezidenţialâ, Dan Mihalache, la zboarâli a premierlui.
