Nadii tra naulu guvernu di Bucureşti
Roxana Vasile, 18.11.2015, 19:21
Naulu Guvernu di Bucureşti cumandusitu di Dacian Cioloş programa tra n’iercuri prima şeditţă. Nu ari chiro tra chireari ! Până tru toamna a anlui yinitor, cându va s-tana alidzeri parlamentare, sunt multe ti adrari. A diapoa aşteptărle a românilor sunt multu mari : dzat di n’ml’ii di persoane ş-li spusira cu boati pi geadii. Nai putan tu una primă fază, politicienii pari că achicasira mesajlu a lor. După dimisia a premierului social-dimocrat Victor Ponta, şeflu a statlui al’i diadi borgi a fostului comisar european tra Agricultură, Dacian Cioloş, s-ndreaga un nau Cabinet, aadrat dit miniştri nitruregimentaţ politic, cu experienţă tru sectorlucari privat ica tru instituţii europene.
Ia ti spusi Prezidentul Klaus Iohannis: Aveţ şansa să scuteţ tru videala cum poati s-hiba guvernata România cu hairi, tru un an complicat şi cu aştiptări multu mari dit partea ali societati, dit partea a popului, ama lipseasti sd-hiţ conştienţa că aştiptărli yin şi dit partea a politicienilor. Am candasearea susto că tută lumea va ca lucarlu s-imna ca una sihati şi tra aesta easti ananghi di un Guvernu hairlaticu.”
Executivlu al Dacian Cioloş aminta, marţa, votlu di pistipseari a Parlamentului. 389 di voturi fura tra, 115 — contra, iara dauă voturi fura anulate. Cu ti andrupari nchiseaşte pi cali Guvernul s-vidzu dit discursurle a reprezentanţalor di la partidili parlamentare. PSD, prit liderlu Liviu Dragnea, ş-dimanda andophiul, condiţionat, ama, di turlia tru cari naulu Executiv va-şi tin’iseasca mandatlu.: Va lu andrupam Guvernul Cioloş ahât chirop cât avem candasearea că va-şi dizvartească activitatea nauntrul a mandatlui agreat, ahât chiro cât va li duca ninti meatrili economiti adoptate di guvernarea a noastră.”
Co-prezidentul PNL, Alina Gorghiu, lugurseasti că Guvernul proaspit nvestit easti una soluţie tra işearea dit actuala criză politică: Alidzem ază una soluţie vinită di la cetăţeni, iara Partidlu Naţional Liberal pistipseasti tru aestă soluţie. Va s-votam naulu Guvernu, tra atea că avem pistusinea că easti una formulă bună şi una soluţie tra işearea dit aestă criză politică.”
Cara UDMR, UNPR şi minorităţle naţionale, alti andicra di atea maghiară, dimandara ca că lu ndrupasca Cabinetlu al Dacian Cioloş, al’iumtrea ALDI, PMP şi Gruplu Naţional Democrat votara contra a lui. Aca lu aproachi pan di mardzina proaspitlu prim-ministru, co-prezidentul ALDI, Călin Popescu Tăriceanu, nu pistipseasti tru un Cabinet di tehnocraţ: Nu escu pi daua ti bunili a dumnil’ilor a voastri naeţ, ama lipseasti nica să ştiţ că persoana a dumneavoastră, deadun cu anamea şi prestigiul di cari vă harsiţ şi pi cari li amintat pi merit, easti poati, fără volea şi ştiinţa a dumneavoastră, parti a unui plan elaborat aoa si un an şi cari ş-pripusi s-da nanparti cu iti paha un Guvernu aleptu democratic şi nvestit prit tin’isearea a tutulor procedurlor parlamentari.”
După darea a giuratlui, marţa, amanat, noaptea, tru prezenţa a prezidentului Klaus Iohannis, s-tanu ceremonia di priloari a mandatlui di premier di cătra Dacian Cioloş, furn’ie tra s-faca una scurtă caracterizari ti pareia a lui: Omin’i’i cari ş-alăsara lucarlu tru cari ahardzira multu chiro şi energie li alăsara nanaprti ti un chiro şi apufusira s-yină şi să-şi baga axizerli tru una echipă cari, am nadia, s-hibă axi s-duca pan di mardzina mandatlu, misiunea pi cari na u deadi Parlamentul.” Pi scurtu chiro ş-di mesi, naulu Guvernu va s-lipseasca s-ndreaga bugetlu pi 2016 şi s-lucreadza tra organizarea a alidzerlor locale şi parlamentare di anlu ti yini. Sunt avuti tru videala un plan di investiţii pi 10 ani, una strategie naţională di dizvoltare, reforme tru educaţie şi sănătate. Ari voli, tutunaoară, tra criştearea şi anvartuseari rolu ti lu ari România tru UE şi NATO, anvartusearea şi dizvoltarea a parteneriatlui strategic cu SUA, cata cum şi susţanerea a nadiilor di integrari europeană ali Ripublica Moldova vitina, majoritar românofonă.
Armanipsearea: Tascu Lala
