Raportu guvernamental

Roxana Vasile, 20.09.2016, 14:06

Criştearea economică ali Românie lugursita tra aestu an easti di 4,8%, anduicra di una prognoză iniţială di 4,2 procente. Habarea fu fapta di premierlu Dacian Cioloş, cari parastisi, luni, situaţia economică a vasiliil’ei tru plenlu a Parlamentului. Uidisitu cu spusa a protlui ministru, pi tută perioada a scurtului a lui mandat di până tora, Executivlu tehnocrat cilastasi tra s-asiguripseasca un mediu economic ma cu pistipseari, cu ndrupamintu tra investiţii, catacum şi una chiverniseari hairlatică şi transparentă a paralui public. Criştearea economică di 5,2% dit PIB tru protlu semestru a aistui an s-yilipseasti tru numirlu ma mari di locuri di lucru, tra scădearea a şomajlui şi tra una ma bună ndridzeari a tin’iilor di cafi mes – spusi premierlu Cioloş.

Cama minutis va na spuna tora — caplu a Guvernului: “Nu avem naeti, până tru bitisita a aistui mandat, s-criştem niti una taxă. Nu avem naeti s-criştem niti un impozit. Nu avem naeti s-alaximu niti una indemnizaţie, aşi cum sa spusi. Nica s-ma multu, tru aestu an n’icsuram TVA-ul la 9% tra lucrărle agricole şi tra inputurile consumate tru agricultură şi tut tra s-ndrupam sectorlu agricol, maxus a n’itlor producători, avem naeti s-yinim cu alaxeri tru noima ca s-avem simplificari tru Codlu Fiscal, prit cari s-pripunem un regim TVA special tra n’itl’I agricultori.”

Dacian Cioloş dimanda că una schemă di agiutor di stat, cari s-yină tru agiutorlu a IMM-urilor, va s-hiba bagata tru practico până tru bitisita a aistui an. Guvernul ndreadzi şi reformarea a sistemului di asistenţă socială şi licsurari fiscale tra atel’i cari inveastesc tru formarea profesională. Zborlu dit Parlamentu tanut di primlu ministru, la zorea ti u baga prezidentul a social-democraţilor, Liviu Dragnea, nu arisi ici PSD, aparent neconsolat di chirearea a putearil’ei aoa si ma puţan di un an, unaoara cu demisia a fostului şef a Guvernului, Victor Ponta.

Tra atea, Liviu Dragnea cutugursi prestaţia a actualui Executiv, di lu stipseasti premierlu Cioloş că nu zbura tru româneşte, ca masi pi limba a tehnocraţilor, cari asuira xenu şi easti aruptă di realitate: “Ufilisitu zborlu creaştire, tru loc di zborlu eşec, iara românii ahurhescu s-ducheasca tut ma multu eşeclu a aistui Guvern.”

Apandisea vini una s-una! “Io nu zburascu şi niti nu voi s-nvetu limba română a dremagogiil’ei şi a populismului” – spusi Dacian Cioloş, cari anvartusi: “Spuneaţ că aestă creaştere economică nu s-veadi tru gechili a oaminilor. Vahi nu s- veadi, nica, tru gechili a oamin’ilor. Problema easti că aestă creaştire, anlu aestu, nu s-vidzu niti tru gechili a mustiradzlor politit şi vahi că aesta zn’iipseasti ma multu.”

Ma multu, prezenţa a lui tru Parlamentu — nica spusi premierlu Dacian Cioloş – nu a avut tru scupo amintarea voturi. Tru perspectiva a alidzerlor legislative dit andreu, alumta politică ahurheasti să s-anturyisească, iti furn’e a iti formaţiuni tra s-aminta capital electoral hiindalui exploatat la maximum. Em, tra partidile reprezentati tru Legislativ, zborlu tanut di premier pari s-hiba, dija, un di tu arada a aistor.

Autor: Roxana Vasile

Armanipsearea: Tascu Lala