Yitriili şi sistemlu di sănătate
Corina Cristea, 13.10.2016, 12:31
Politica di paha ti easti tru practico tru România pruveadi că, tru aestu kiro, producătorlu a unal’ei yitrie inovativa a curi îl’i si bitiseasti patentul – după tinti ani di vindeari — ari borgea să scadă irusi pahalu cu 35%, până la nivelul a naima scumpal’ei yitrie alternativa. Catastisea feati ca nascanti yitrii s-agiungă ahât ieftine câte una parte dit producători s-nu li aducă tru România, practic aesti keru dit spitale şi farmacii, ti lahtarea a landzitloru. Datili yilipsescu că, masi tru anlu dit soni, 1.057 di yitrii fura trapti di producătorl’i şi distribuitorl’i dit România.
Pritu cilastasearea tra s-curma aestu fenomen, ama şi exportul paralel – dimi atel prit care yitrii aduse cu paha n’icu tru România suntu vindute cu profit multu mare tru vasilii cata cum Germania ica Franţa -, Ministerlu a Sănătatil’ei di Bucureşti mindui reguli nai pi pazarea a yitriiloru, una di aesti hiindalui eşalonarea tra iftiniri. Ase, prit una yinitoare Hotărâre di Guvern, a curi proiectu va s-hiba adus dininti tra dezbatere publică, yitriili cari işira di sum patentu va s-hiba ieftinite tru protlu an cu 10%, cu nica 10% tru doilu an şi cu 15% tru treilu an.
Fatem ieftinirea tru ma multi hopi, tra s-nu agiundzem la una naua criză a yitriiloru, s-nu agiundzem tru catastisea ca pacienţal’i s-armână fără yitrii, aca au ndreptul pan di mardzina tra eale.” — exighisi ministrul a Sănătăţii, Vlad Voiculescu. Farmaciştii si distribuitorl’ii va s-aiba borgea s-da giueapi dzua di dzuua tra stocurle di yitrii compensate, tru un sistem electronic. Tutunaoara, yiatarl’I şi pacienţal’ii va s-poata s-verifica pe internet desi una yitrie easti ica nu pi pazari, a deapoa ministerlu va s-l’ia borgea s-ndreaga lucarlu tra un kiro di 7 dzale di la dimandari. Di altă parte, dosarlu electronic a pacientului va s-agiunga obligatoriu curundu, tru aestu kiro s-lucreadza la legislaţia incidentă, dimanda prezidentul di la Casa Naţionala di Asiguripseri tra Sănătate, Radu Ţibichi.
Dosarlu electronic di sănătate easti un proiectu bitisitu, un sistem funcţional, până tru aesta oara hiindalui adrati aproapea 6 miliun’i di dosare, ama are una mare problemă – nu easti obligatoriu. Apufusitorl’I spun că dosarlu electronic a pacientului easti una halati cari poate s-crească siguranţa a pacientului, tra atea că tru oara anda yeaturlu are izini la tuti informaţiile ti evoluţia a patologiilor tra pacientulu respectiv, ari cabilea s-l’ia una apofasi ma timil’iusită şi tru scurtu kiro, tu ti mutreasti problema di sănătate cu cari aestu s-prezintă, ica easti conştientu, ica easti inconştientu. Teoretic, aestă aplicaţie poate s-hiba accesată di iti insu ti ari un cardu di sănătate, a curi yeaturlu al’i feati discl’idearea a cartil’ei. Una caftari ti easti ananghisita, ama, easti atea ca sistemlu informatic a cardului di sănătate — indisponibil, diznau, tru aesti dzale, di furn’ia a nascantoru probleme tehnite di comunicaţie anamisa di componentili a lui, lipseasti s-hiba pi lucru.
Autor: Corina Cristea
Armanipsearea: Tascu Lala
