Un an di la Colectiv
Corina Cristea, 31.10.2016, 12:27
N’il’i di insi loara parti, dumanică, Bucureşti, la una urdinari a tatearil’ei, tra s-nsimneadza umplearea un an di dzali di la marli foc dit clublu Colectiv, tu cari murira 64 di insi – majoritatea tiniri -, tru atea noapte ica tru mesl’i yinitori, di furn’ia a aran’ilor şi a infecţiilor intraspitaliceşti. Traghedia dusi la protesti tru lao contra ali arusfeti la nivel analtu şi, pan tru soni, la cădearea a guvernului Victor Ponta, scoasi tru migdani probleme tru sistem şi alăsa napoi miri alaxiti. Suntu nica multi antribări cari aşteaptă apandisi, multe arăni nivindicate tru suflitili a familiilor ti suntu di jeali şi multă tran’ipseari tra atel’i cama di 100 di pliguiţ, mari parti di nasi avandalui nica ti alumtari tra recupearari.
Foclu nchisi dupu focurli di artificii ufilisite tru kirolu a unui concertu ţanut di pareia rock Goodbye to Gravity. Materialu di antifonari ufilisit, non-ignifug, dusi la tindearea irusi a focului, atel’i aproapea 350 di insi ti eara nauntru fura acatat ca tru una pringa di foc, cu una goala işeari, cata cari vinira, calbalachi, tut atel’i ti eara nauntru. Dupu un an di la traghedie, un monumentu ahardzitu ti adutearea aminti a victimilor fu dizvalit la oara cânda plascanea foclu, dinintea a casil’ei iu eara clublu bucureştean oamin’il’i ţanura una minuta di arigeai şi, simbolic, un proiector pitricu catra teru una aradza di lun’ină.
Şi prezidentul Klaus Iohannis dipusi una caruna di lilici şi apreasi una teara la clublu Colectiv: România s-alaxi. Verificărli suntu ma limbidz, cama tru numir la ahtari localuri iu s-ndregu evenimente, ari proceduri ma buni, ma limbidz tru dalga di domenii. Alti lucri nica nu s-alaxira după minduita a mea cabaia nu suntu duri, dimec vream sa stiu după un an di dzali cari easti cu cabati tra aestu accidentu teribil.”
Ancheta a procurorlor, nibitisita nica, scoasi tru migdani că atea ti s-feati la Colectiv — un di nai ma marl’i fanicadz dit Europa tru decheniili dit soni – fu provocat di multili lucri slabi, nchisindalui di la izinea tra s-intra tru club un numir multu mari di insi până la turlia tru cari eara loati autorizaţiile di funcţionare. Trei dosari mutrindalui drama di la Colectiv suntu tru instanţili civile şi militare.
Prezentu şi el, dumanică, la locul a incendiului premierlu Dacian Cioloş spusi că “easti borgea a cafi unlui insu s-nveaţa dit traghedia di la clublu Colectiv şi s-nu agarseasca iu duti aradearea, aroganţa şi arusfetea”. Un concertu caritabil tanura ndaua dzat di parei rock, a deapoa paradzl’i adunat pi cartali di intrari hiindalui daţ a atiloru cari nica suntu tru ananghi cu yitripsearea ti aran’ili dit incendiu.
Autor: Corina Cristea
Armanipsearea: Tascu Lala
