Graţierea şi alaxearea a codurlor penali, tru dezbateri (19.01.2017)
N’il’i di oamin’i işira pi geadii, n’ercuri dicseară, Bucureşti şi tru alta casabadz mari dit vasilie, tra s-muta cap andicra di naetea a naului Guvernu tra s-graţiadza ma multi persoani condamnati şi tra s-alaxeasca şi Codurli Penali. “Vrem justiţie, nu corupţie, democraţie, nu amnistie” — fura leit-motivele a man’ifestanţalor, cari stipsescu explicit decidenţal’i politici că minduescu să-şi scoată dit hapsani sot di partid, soie ica sot.
Bogdan Matei, 19.01.2017, 12:49
N’il’i di oamin’i işira pi geadii, n’ercuri dicseară, Bucureşti şi tru alta casabadz mari dit vasilie, tra s-muta cap andicra di naetea a naului Guvernu tra s-graţiadza ma multi persoani condamnati şi tra s-alaxeasca şi Codurli Penali. “Vrem justiţie, nu corupţie, democraţie, nu amnistie” — fura leit-motivele a man’ifestanţalor, cari stipsescu explicit decidenţal’i politici că minduescu să-şi scoată dit hapsani sot di partid, soie ica sot.
Ma ayon’ia, informaţiile dimandati tru spaţiul public, uidisitu cu cari Cabinetlu lipsea s-adopta fără dezbaateri publică ordonanţili, alu featira pi prezidentul Klaus Iohannis s-yină personal la sediul a Guvernului şi să u cumanduseasca şedinţa a echipal’ei executiva al Sorin Grindianu. Şeflu a statlui ş-avea spusa ma nainti, opoziţia categorică andicra di aesti alaxeri, tra cari spusi că pot s-algheasca dosari. Nica si publicati pi frandza di internet a ministerlui ali Justiţie şi pitricuti tra consultari a principalilor instituţii implicati, proiectili a ordonanţilor di urgenţă elaborati tru aesta noima pruved graţierea acutotalui a pideapsilor cu hapsani di până la 5 an’i inclusiv.
Pot s-hiba, tutunaoara ngiumiticati termenili di hapsani tra atel’i cari umplura 60 di an’i, cari au ngatan si mutrescu n’icazanta cu ilikia di până la 5 an’i şi tra mul’erli ncarcati. Graţierea va s-hiba condiţionată di achitarea – tru nai cama multu un an di la bagarea tru libirtati – a zn’iilor apufusiti di instanţă. Nu va s-harseasca di graţiere recidiviştil’i ica atel’i condamnaţ tra infracţiuni ti li adrara cu priscavil’e, contra a siguranţal’ei a statlui şi tra fapti di mari corupţie.
Ordonanţa cari alaxeasti pruvideri dit Codurli penale stipuleadză că denunţătorl’i numata va s-ascapă di răspundirea penală, cara nu va s-dipuna denunţul tru un vade di şasi mesi di anda u feati fapta. Ma multu, abuzlu tru serviciu va s-hiba infracţiuni masi cara zn’ia adrata easti ma mari di 200.000 di lei (echivalentul laaproapea 50 di n’il’i di euro). Ministrul social-democrat ali Justiţie, Florin Iordache, spuni că alaxerli suntu ananghisiti tra s-ndreaga supracalbalakea a hapsan’ilor, iu suntu cu aproape nauă n’il’i di hapsinatiţ ma multu andicra di spaţiili di hapsani, şi tra sa u faca simfuna legislaţia cu apofasili a Curtil’ei Constituţionali.
Ministurlu aduti aminti că România fu condamnată, la CEDO, tra arali tratamenti şi tra atea ti numaseaşti condiţiile inumane” dit hapsan’i. Di nomlu a graţiearil’ei, adavgă Iordache, va s-harseasca aproapea 2.500 di insi.
Al’iumtrea, procurorlu general ali Românie, Augustin Lazăr, sa spusi susto contra a nascantor acti di clemenţă di aesta turlie. El cutugurseasti ixikea di transparenţă a gaeretil’ei guvernamentala şi spusi că textili lipseasti s-hiba analizati tru Consiliul Superior ali Magistratura.
Prezidenta a Curtil’ei Suprema, Cristina Tarcea, fati timbihi, tru arada-l’i, că alaxerli pot s-aduca haua tru instanţi şi spuni ca easti pi daua că membril’i a Guvernului au axizeri juriditi.
Autor: Bogdan Matei
Armanipsearea: Tascu Lala
