Hăbări dit bana românească şi internaţională
Cama di 100 di alepţă locali dit Republica Moldova, cari simnară ună declaraţie ti fătearea ună cu România, s-andămusiră, tru aestu weekend, Iaşi, iu fură aştiptaţ di primarlu a căsăbălui, Mihai Chirica. Cu aestă frnʹie fu thimilʹiusită Liga a Alepţăloru Locali Unionişti. “După 27 di anʹi di independenţă tru Ripublica Moldova, democraţia easti la praglu di nghiosu, ftuhia easti sum praglu di mesi a bănaticlui, ama maşi fătearea ună cu văsilia va s-da silă şi va s-aducă ună nădielimbidă di dezvoltari ali Ripublică Moldova deadun cu România”– declară Ilie Leahu, viţeprimarlu a hoarălʹei Băcioi, ţi easti aproapea di Chişinău. Tu arada a lui, Prezidentul ali Acţiuni 2012, George Simion, spuni că bărnul di ază ari borgea s-facă tuti gaereţli ti fătearea ună cu patrida.
Daniela Budu, 13.03.2018, 09:20
Cama di 100 di alepţă locali dit Republica Moldova, cari simnară ună declaraţie ti fătearea ună cu România, s-andămusiră, tru aestu weekend, Iaşi, iu fură aştiptaţ di primarlu a căsăbălui, Mihai Chirica. Cu aestă frnʹie fu thimilʹiusită Liga a Alepţăloru Locali Unionişti. “După 27 di anʹi di independenţă tru Ripublica Moldova, democraţia easti la praglu di nghiosu, ftuhia easti sum praglu di mesi a bănaticlui, ama maşi fătearea ună cu văsilia va s-da silă şi va s-aducă ună nădielimbidă di dezvoltari ali Ripublică Moldova deadun cu România”– declară Ilie Leahu, viţeprimarlu a hoarălʹei Băcioi, ţi easti aproapea di Chişinău. Tu arada a lui, Prezidentul ali Acţiuni 2012, George Simion, spuni că bărnul di ază ari borgea s-facă tuti gaereţli ti fătearea ună cu patrida.
Reprezentanţălʹi a Ministerlui di Externi s-andămusiră, Bonn, cu membrilʹi a comunitatilʹei româneşti dit Ghirmănie, furnʹie cu cari fură parăstisiti gaereţli di modernizari şi informatizari a şingirlui consular român. Secretarlu general ali MAE, Cosmin Ditescu, cundilʹe simasia ti hăbărisearea tinʹisită şi tru oară ananghi a cetăţeanʹilor românʹi cari s-hărsescu di năili platformi tră serviţii consulari. El lă deadi curayiu, tutunăoară, a reprezentanţăloru dit mediulu asociativ românescu s-bagă tru lucru avantajili/ amintatiţli a aiştoru hălăţ şi s-li minduească cu hăiri hăbărli agiumti tru arada a comunităţlor româneşti locali. Tutunăoară, directorlu general a Departamentului Consular, Bogdan Stănescu, scoasi tru migdani hăirea a serviciului ţi faţi timbihi pritu mesajili di turlia a SMS-urlor, a aplicaţiilʹei tră telefoane mintimeni “Urdină tru sigurlăchi “, a sistemlui ti făteari timbihi pritu SMS a cetăţeanʹilor românʹi a curi lă si bitisescu ca vade paşapoartili, cum şi a hăbărlor tu ligătură cu catastisili di piriclʹiu tru cari pot s-hibă acăţat cetăţeanʹili români tru xinătati.
Prezidentul Klaus Iohannis ălu vulusi nomlu ţi da izini a alegătorlor cu şidearea tru xinătati s-pitreacâ câftărli şi copiile după documentili ţi suntu ananghi ti ngrăpsearea tru Registrul electoral şi prit e-mail. Nreghistrarea s-faţi pi thimelʹilu a unălʹei căftari ngrăpsită, datată şi cu semnul băgatu/ vulusită, dipusă personal ică pitricută prit poştă ică e-mail cătră misiunea diplomatică ică oficiul consular dit cratlu iu easti cu şidearea ică reşedinţă. La căftari va s-adavgă ună copie a paşaportului cu spunearea a cratlui iu easti cu şidearea, tru cazlu a cetăţeanʹilor românʹi cu şidearea tru xinătati, ama ş-cu ună copie a actului di identitati şi ună copie a documentului cari yilipseaşti ndreptul ti şideari, apufusitu di autorităţli xeani, căndu easti zborlu ti cetăţeanʹilʹi români cu reşedinţa tru xinătati. Votlu prit corespondinţă tră românʹilʹi dit diaspora easti tu nomu maşi la alidzerli parlamentari, ama nu şi atumtea căndu s-ţănu alidzeri prezidinţiali şi europarlamentari.
Marea Britanie easti prota distinație tru alidzerli a românʹilor cari fug ditu văsilie – spun datili a Institutlui Naţional di Statistică. Aproapea 63.000 di românʹi, dimec 30% dit tuţ atelʹI ţi fudziră dit văsilie tru 2016, aleapsiră ca destinaţie Marea Britanie. Aestă armâni, aşe, tră doilu an arada, destinaţia ţi u aleg românʹilʹi cari fug tru xinătati, ngrăpseaşti şi Ziarlui Financiar. Tru 2015, aproapea 55.000 di emigranţă românʹi (dimec 28% dit tuţ aţelʹi cari fudziră) aleapsiră Marea Britanie.
Prezidenta ali Organizație di Mulʹeri PSD Diaspora, orădeanca Lilla Dibelka, ţi ma ninti eara consilier local a municipiului Oradea, fu aleaptă secretar di stat tru Ministerlu a Românʹilor di Iuţido. Ea îlʹi lʹia loclu al Ovidiu Cristian Iane, ţi fu scos di pi ipotisi. Numasearea fu vulusită di premierlu Viorica Dăncilă.
Udălu a Hăbărlor/ Camera Stirilor
Armânipsearea: Taşcu Lala
