Muabeț ti hâbinisearea-a restricțiiloru
Corina Cristea, 22.04.2020, 17:13
Tru România, vadelu nai cama cu nâdii ti bâgarea tu practico a meatriloru di hâbiniseari restricţiili ți eara apufusiti di itia-a pandimiillei di coronavirus va s’hibâ tu mesi di meslu maiu, lugursescu autorităţli di București. Ari ținți stâmâñi di anda urdinarea easti restricționatâ — româñilli ședu n’casâ, di iu pot s’iasâ mași cu furñii ghiini ntimilleati, ti paradigmâ tră ș’ancupârâ mâcari icâ yitrii. Icâ tra s’ducâ la huzmeti, tru catastisea-a ațiloru, nu dipu mulțâ, cari asiguripsescu lucârlu ti niscânti comati di activitati. Școlliurli suntu ncllisi ditu 11 di marțu, a deapoa dukeñili — ma pțânu ațeali ți vindu bunuri di protâ ananghi — au activitatea dânâsitâ. Idyea s’fați și trâ restauranti, cafineadz și ntreprinderi, a deapoa, efectili a tutâloru aiștoru meatri ți s’loarâ tru condițiile a catastisillei di ananghi apufusitâ tru cratu alasâ toru tru icunumie. Suntu tut ahântea itii tră cari hâbărli buni, di iți turlie s’hibâ eali, suntu gurli di oxigenu tră tuț. Unâ ditu aesti vini, marțâ, di partea-a caplui a statului, cari, tu bitisita ali unâ andamasi la cari eara viniț premierlu, unâ parti ditru miniștri și caplu a Departamentului trâ Catastisi di Ananghi, dimândă că “vini oara s’minduimu ti ațea ți ari numa a unlui planu di hâbiniseari, atumțea cându condiţiile va s’hibâ mplini”.
Ia ți spusi Klaus Iohannis: “Easti tora tru practico un decret trâ catastisea di ananghi ți s’bitiseaști cu vadelu tu 15 di mai. Dimecu, dupâ data di 15 di mai, cara numirlu di persoani infectati scadi, cara numirlu di morțâ dupu lângoari scadi, cara noi va s’tiñisimu meatrili bâgati di autorităţ şi lucârli acațâ calea ațea buna, easti limbidu că putem s’intrăm, atumțea, tru unâ comatâ di hâbiniseari. Voi să spun, ama ditu ahurhitâ câ aestâ hâbiniseari va s’hibâ faptâ jgllioatâ di jgllioatâ, nu va s-aibâ unâ hâbiniseari dinâoarâ, di itia câ specialişțâlli nâ spunu că viruslu nu va s’kearâ, dimecu ma largu, va s’lipseascâ s’bânămu cu niscânti restricţii. Aesti lucri, ama s’apufusescu, pi thimellilu a spunerloru ştiinţifiți şi medicali, di cătră politicieni, di cătră guvernu.”
S’clleamâ câ zburâmu ti unâ hâbiniseari cu preayalea, nu ma ayoñea di 15 di mai și mași cara datili medicali va sâ spunâ limbidu că ațea ți eara ma zori tricu, câ evoluția easti unâ pozitivă și că lucărli pot s’hibâ viglleati.
Tru oara anda va s’ahurheascâ hâbinisearea-a restricțiilor, borgea a cathi unlui va s’creascâ, feați timbihi prezidentulu: “Easti idyealui di mari simasie s’akicâsimu tora, dupâ ți tricumu unâ hopâ importantâ ditu aeastâ epidemie, dimi s’akicâsimu că hâbinisearea-a spuni câ autorităţli va s’minteascâ ma pțânu tu bana a cathi unlui insu și atumțea borgea va s’hibâ ma multu di cum easti tora a cafi unlui ditu dumnilli a voasti, vruț româñi.”
România di itia câ easti pi ohtulu ascendentu ali așuțâturâ/ a curbâllei — easti tru creaștiri numirlu di cazuri, idyealui și ațelu a morțâloru, spusi, tu arada-a lui, realistu și cu ngâtanu, ministurlu a Sânãtatillei, Nelu Tătaru, cundillindalui câ ma s’agiungâ pi unâ hâbiniseari a restricţiilor, aestâ poati s’hibâ acâțatâ tu isapi dupâ evaluarea cari va s’facâ meslu ți yini.
Nyrâpsearea: Corina Cristea
Armânipsearea: Tașcu Lala
