Ndridzeri ti unâ nauâ aradâ di bânaticu
Corina Cristea, 24.04.2020, 07:26
Dupu aproapea 60 di dzâli di cându tu locârli ali Românie fu aflatu protlu caz di infectari cu năulu coronavirus, autoritățli di București zburăscu ti planurli ți va s’da silâ a economiillei, ama și di hâbiniseari restricțiili ți eara bâgati unâoarâ cu apofasea ți fu loatâ aoa și un mesu di dzâli ș-cama ti catastisea di ananghi. 16 di mai easti data la cari lucârli pot s’hibâ tu aradâ/ s-ahurheascâ calea di ma ninti tra s’fitruseascâ pandemia, ama – u spun caplu a statlui, ministurlu a Sănătatillei și tuț specialișțâlli mintiț ti kivernisearea-a aliștei catastisi excepționalâ — viruslu nu va s’kearâ și lipseaști s’hibâ aflatâ unâ turlie pritu cari s’bânăm ma ma largu cu fuvirsearea’a lui. Andamasili anamisa di ațelli ți apufusescu‚ dizvârtescu cu idyea aradâ criscutâ, a depoa prezidentul Klaus Iohannis ari dimândatâ, unâ parti ditu meatrili ți lipseasti s’hibâ bâgati tu practico meslu ți yini. Unâ ditu aesti — scutearea restricţiili mutrindalui urdinărli a cathi unlui insu.
Ia ți spusi Klaus Iohannis: “După data di 15 di mai, tutâ lumea lipseaști s’poartâ masca di protecţie tru spaţiili publiți ncllisi şi atumțea cându ufilisimu transportul public comun. Aeastâ apofasi nu easti limitată tru kiro şi va s’putem s’trâdzemu mânâ di la purtarea-a mascâllei vahi anlu ți yini, atumțea cându aestă pandemie va s’hibâ viglleatâ/ sum control şi numata va s’aibâ piriclliul ti infectari. Unâ a daua apofasi, ți u vulusimu easti unâ ți cadealihea va’lli hârseascâ mulțâlli româñi. După data di 15 di mai, dimi dupâ ți s’bitiseasti catastisea di ananghi, va s’trâdzemu mânâ di la meatrili, ti ñicșurari urdinarea, ți mutrescu oamiñilli, dimecu numata va s’lundzeascâ ngârderli/ restricţiile ti urdinarea individualâ icâ alliumtrea spusâ, va s’putem s’urdinămu tru locâri publiți și nu va s’lipseascâ s’avemu cartea tu cari spunemu iu nidzemu și câțe nidzemu. Easti zborlu ti elefterisearea di urdinari a cathi unlui insu/ individualâ.”
Minduim s’agiundzemu tu ațea ți va s’dzâcâ “unâ nauâ aradâ/ normalitati”, exighisi caplu a statlui, cundillindalui, ama, că “trâ vigllearea gheneralâ a bânâtorloru şi trâ vigllearea a cathi unlui insu, multi ditu apofasili ți ngârdescu/ ți nu da izini va s’armânâ ma largu tu practico: “Aestâ turlie, cadealihea va s’armânâ tu practico — zburăscu ti după 15 di mai – tru practico interdicţiili trâ adunări publiți, trâ tuti turliili di manifestări. Până tru 15 di mai, până cându iasi ditu vade catastisea di ananghi di tora, tuti ngârderli/ restricţiile armânu tru lucru. Nâpoi u spunu, pânâ tru 15 di mai, șideț acasâ, tuti ngârderli armân tru practico. După 15 di mai, va s’putemu s’nâ minămu cama elefteru, ama bana numata va s’toarnâ, ti amârtie, tu arada/ normalitatea ți u șteamu ninti di aestâ pandemie. Va s’avemu un planu di hâbiniseari jgllioatâ cu jgllioatã, va s’apufusimu di tamamu ți huzmeti și cându poati s’ahurheascâ”.
Unâoarâ cu scutearea a ngârderloru/ restricțiilor, borgea ti cathi un insu va s’hibâ ș’cama mari, trâ tuț, maxus ti câtiguriili crehti/ vulnearabili, nâpoi adusi aminti prezidentul Klaus Iohannis.
Ngrâpsearea: Corina Cristea
Armânipsearea: Tașcu Lala
