Meatrili di relaxare, sum semnul a ntribarillei
Daniela Budu, 30.06.2020, 11:41
Pareaia Tehnico-Stiinţificâ, ntribatâ di guvernul di București, pripuni amânarea ti a patra hopâ di relaxare a restricţiilor cari lipsea s-hibâ bâgatâ tru lucru di la 1 alunaru. Pripunirea yini tu hâvaia a unâllei creaştiri babageanâ a cazurlor di COVID 19 tru dzâlili ditu soni, nica şi di itia câ nu furâ tin’isiti di mulţâ români regulili di protecţie sanitară. Numirlu di năi cazuri tru 24 di săhăt ditu soni ma largu easti multu ma mari andicra di atel a pacienţilor vindicaţ, dimecu nsmineadza că spitalele ditu România suntu cu câlbâlki tut ma mari. Creaşti şi numirlu a lândzidzlor la terapie intensivă, cum și aţel a oamin’ilor ţi murirâ. Câlisitu la un postu di televiziune, ministurlu a Sănătatillei, Nelu Tătaru, zburâ ti unâ evoluţie nifavorabilă tru dauli stâmân’i ditu soni, furn’ie trâ cari, naima pţânu pi nivelu a Grupului di Suport Tehnico-Ştiinţific, s-apufusi amânarea a nauâllei hopâ di relaxare a restricţiilor.
Nelu Tătaru: Furâ dauă stămâni tru cari avum unâ creaştire a numirlui di cazuri năi, dauă stămâni tru cari criscurâ cazurli tru tarapie intensivă, criscu numirlu a morţâloru şi urminiili a specialiştilor ditu Grupul Tehnic suntu ta s-amânâ nâili meatri di relaxare ţi li avem ti 1 di alunaru. Him tru oara tru cari kivernisimu un numir di cazuri criscut şi s-apufusi, la nivelu a Gruplui Tehnic, s-amânăm a patra apofasi di relaxare. Evaluăm cafi dzuuâ, cafi stămânâ, la dauă stămâni. Tru kirolu cându evoluţia va s-agiungâ favorabilă, nâ minduim şi la unâ altu şingiru di misuri di relaxare. Tru kirolu cându ari atea transmiteari comunitară accentuată, nâ minduim câ, punctual, tru nâscânti locaţii, s-putem s-bâgâm şi alti restricţii: izolarea a aţilui focar, carantinarea a aţillei zonâ”.
Apofasea di bitisitâ va s-hibâ loatâ n’iercuri di Executivlu di București. Tut n’iercuri fu hâbârisitâ unâ andamasi di lucru la Guvernu tra s-ndreagâ un nău plan di misuri tră tin’isearea-a regulilor contra a pandemiillei di COVID-19. Premierlu liberal Ludovic Orban, cari feaţi timbihi că evoluţia tru dzâli ditu soni nâ caftâ s-avem ngâtanu, greaşti ama şi tră unâ anadamasi a miniştriloru şi aţelli ţi au borgi tru interni, sănătate, ali Poliţie Românâ şi di la alanti instituţii a statlui cu borgi ti control. Di altă parte, Comitetlu Naţional tra Situaţii di Ananghi ari apufusitâ câ organizatorllii di activităţ şi evenimenti cari nu tin’isescu regulile di sigurlâki sanitară s-hbâ sancţionaţ cu suspendarea autorizaţiillei di lucru. Tru arada a lor, yeaţârlli epidimiologi şi infecţionişti fac timbihi câ ma s-nu hibâ tin’isiti meatrii di prevenire, numirlu a cazurlor năi poati s-creascâ ma largu u yinitor. Până tora, pi teritoriul ali Românie, furâ confirmati cama di 26.500 di inşi infectaţ cu năulu coronavirus. Suceava (nord-est) easti pi protlu loc tru ţi mutreasti cazurli, deapoa București și Braşov (centru). Dit arada a persoanilor confirmati pozitiv, aproapea 19.000 furâ declarati vindicate şi externati. Cama di 1.600 di oamin’i murirâ.
Autor: Daniela Budu
Armânipsearea: Taşcu Lala
