Concluziili a aţilui ditu soni raportu MCV
Tașcu Lala, 09.06.2021, 14:47
Comisia Europeană veadi ună tendinţă hăirlătică tru reforma-a sistemlui judiciaru şi tru alumta contra ali aruşfeti ditu România, ama dimăndă că ma largu va u aibă tu mengă turlia cumu s-duţi catandisea până căndu va s’hibă tiñisiţ tuţ scupadzlli. Comisia publică, marță, raportul mutrinda progresili fapti di autoritățli di București ditu cadurlu a Mecanismului di Cooperari şi Verificari apufusitu nica di la aderarea ali Românie la UE, tru 2007, și a curi scăpo easti tamamu aţelu ta să scoată tu videală eventuali defecţiuni şi ta s’pripună cearei tu angrenajlu ali justiţie.
A deapoa, Comisia salută şi aţea că, anlu aestu, s-deadi ună nauă silă tu planlu di reformă şi băgarea tu aradă a lucărloru ţi armasiră năpoi ditu kirolu 2017-2019. Di aestă itie – spuni Executivlu comunitaru — s’feaţiră jgllioati ninti tu ligătură cu tuti urminiili ditu cadurlu a MCV cari nu fură, nica, băgati tu lucru, a deapoa multi ditu aesti suntu aproapea tiñisiti, cara progresili va s’armănă tu idyea scară. Tru minduita-a Comisiillei Europeani, România lipseaşti s’lucreadză nica şi la alti şapti urminii ditu 2018 şi la dzaţi urminii ditu 2017. Easti cutugursită număsearea, tu ahurhita-a anlui ţi tricu, a procurorlui gheneral a văsiliillei şi a şeflui DIICOT, acă avea unu avizu negativ a Consiliului Superior ali Magistratură.
Şi a CSM-lui ălli si da ună topcă lae, ntră altili ti minduita pi dauuă mutrinda scutearea di pi lucru a Secţiillei di Investigari a Infracţiuñilor ditu Justiţie, a curi existenţă şi funcţionari suntu lugursiti, Bruxelles, di sinferu. Tamamu tu dzuua anda fu faptu publicu năulu raportu MCV ali Comisie Europeană, Bucureşti, Curtea Constituţională ş-u ţănu, ama, apofasea ţi spuni că Secţia speţială tră magistraț easti constituţională şi nu poati s’hibă ncllisă că maş di Parlamentu, pritu unu nău nomu.
Ministurlu ali Justiţiei, Stelian Ion, tăxi că va s’află cearei: Nu putem s’aştiptămu di la Curtea di Justiţie a Uniunillei Europeani s’nă ndreagă problemili interni. Nă si alăsă tută libirtatea s’făţemu aestu lucru. Tutunăoară, nu putemu s’aştiptămu maş di la justiţie s’hibă ndreapti aesti problemi, dimi, easti multu di simasie, tu harea di politicieañi ţi himu, ta s’aflămu ceareaia ti ncllidearea ntrăoară a aliştei Secţii di Investigari a Infracţiunilor ditu Justiţie şi lugursescu ma largu că proiectulu a Guvernului easti aţelu corectu şi va s’cilăstăsescu să’lli căndăsescu soţlli a melli parlamentari s’acaţă calea ti aestă cearei. Easti multu di simasie s’aprăftăsimu s’ncllidemu aestă Secţie cari, nica şi tru aistu raportu, fu cutugursită.”
Tru ţi mutreaşti alumta contra ali aruşfeti, Comisia Europeană cundilleadză că număsearea-a unlui nău şef la DNA dusi la stabilitati instituţională. Catastisea agiumsi s’hibă cama bună andicra di 2019, ama DNA s’ampuliseaşti cu unu şingiru di provocări, ună di eali hiinda ixikea di personalu — nica spusi Comisia.
Autoru: Roxana Vasile
Armânipsearea: Taşcu Lala
