Festivalu Enescu 2021

Bogdan Matei, 30.08.2021, 19:59

Sâmbătă, cu ună dzuuă ninti ta s’cadă tu căsăbălu Sibiu cortina pisti Festivalul Internaţional di Teatru, nai ma marea sărbătoari ditu România a artilor spectacolului, Bucureşti arăsuna protili acorduri a Festivalui Internaţionalu di muzică clasică George Enescu. Ediţia di anlu aestu easti a 25-a di la thimilliuseari, tru 1958, şi yiurtuseaşti 140 di añi di la amintarea-a marlui compozitoru românu.

Dirijorlu rusu Vladimir Jurowski easti, şi la aestă ediţie, directoru artisticu a festivalului. El spuni că “la ediţia aniversară lli’avemu deadunu cu noi nai cama importanţălli muzicieñi a momentului tru lumi şi promovăm idheea-a culturlor europeane uniti.”

3.500 di artişti români şi xeñi yin la festival.Chiro di unu mesu, până tu 26 di yismăciuni, va s’hibă prezente pe sţenă 32 di orchestre ditu 14 di văsilii. Pi ningă spectacolili ditu Capitală, va s’hibă concerti şi Sibiu, Timişoara, Iaşi, Constanţa şi alţă căsăbadz mări ditu văsilie.

Directorlu executiv a Festivalului George Enescu, Mihai Constantinescu, dimăndă că “suntu concertili a măloru orchestre cari nă viziteadză tru aestu an, ahurhinda di la aţeali şase orchestre britaniţi, dauă ghirmani, dauă francezi, dauă olandezi, dauă italieani, alti orchestri cari yin ti prota oară tru festival – atea ditu Croaţia, aţea ditu Gărţie. Pi nigă tuti numili internaţionali pi cari puteţ s’li videţ tru programlu a nostru, va s’videţ şi mulţă artişti români — nai cama buni orchestri ditu văsilie”.

România culturală s’toarnă diznău la bana normală – luyurseaşti premierlu Florin Cîţu:

“Easti ună pirifañe s’himu şi estanu nicuchirlli a Festivalui Internaţionalu George Enescu şi mi hărsescu că evenimenti culturali suntu ndreapti iuţido tru văsilie”- ngrăpsi năsu pi Facebook.

Şeflu a Guvernului lli-asiguripsi organizatorlli di tută tiñia a lui tră ceareili ţi li aflară aţea turlie că nu maş aţelli ţi suntu tru sală să s’hărsească di actulu artisticu, ama şi spectatorllii ditu mediulu online.

“A 25-a ediţie a Festivalui Internaţionalu George Enescu nă aduţi cu ună jgllioată ma aproapea di societatea cu cari nă aveamu nviţată şi di cari fum privaţ, ună societate a sălliurloru di spectacoli şi concerte mpline, ună societate a xanaamintarillei pistipsearea ta s’himu deadunu ti srbăturiseari calitatea. Realitatea recentă nă feaţi s’tiñisimu multu di multu tut atea ţi nă anvărligheadză, s’nă hărsimu di cathi iho, s’dukimu dorlu românescu ti tradiţiile şi cutumili cari nă spunu identitatea naţională” – spuni, tu arada-a lui, ministurlu a Culturăllei, Bogdan Gheorghiu.

Ca tu cathi ediţie, Radio România, pritu formaţiili a llei muzicali şi pritu specialiştilli a llei audio, easti, pi ningă Televiziunea Română, co-producător a festivalui Internaţionalu George Enescu.

Autoru: Bogdan Matei

Armânipsearea: Taşcu Lala