Un an di vaccinari anti-COVID tru România
Di la umplearea un an di la administrarea-a protălei doză anti-Covid, văsilia easti pi penultimul loc tru Uniunea Europeană ditu punctul di videală a gradlui di imunizare, cu aproapea 7,8 milioane di români cu schema di vaccinare completă. Dimecu niheamă pisti 40% ditu totalu a populațiillei ică 44% ditu populația eligibilă. Datili oficiale tru aţea ţi mutreaşti pi aţelli cari feaţiră până tora și a treia doză spuni un numiru di aproapea 2 milioane di români.
Corina Cristea, 28.12.2021, 19:05
Di la umplearea un an di la administrarea-a protălei doză anti-Covid, văsilia easti pi penultimul loc tru Uniunea Europeană ditu punctul di videală a gradlui di imunizare, cu aproapea 7,8 milioane di români cu schema di vaccinare completă. Dimecu niheamă pisti 40% ditu totalu a populațiillei ică 44% ditu populația eligibilă. Datili oficiale tru aţea ţi mutreaşti pi aţelli cari feaţiră până tora și a treia doză spuni un numiru di aproapea 2 milioane di români.
Maş şcurti perioadi di entuziasm ică di frixi ti u adusiră dăldzăli succesive a pandemiillei deadiră ună silă a campaniillei di vaccinare – ună campanie cari avea nkisită cu ndreptul, di u adusi tu ahurhită România anamisa di protili. Tora, autoritățli și specialiștilli tru Sănătate publică estimeadză că tru yinaru va s’ahurhească ună nauă dalgă a pandemiillei tru România, tru contextul arăspândearillei varianta Omicron, deapoa turnarea tu văsilie di Sărbători a aţiloru cari lucreadză tru xeani şi a atiloru cari va s’toarnă ditu vacanţă. Unităţli sanitari s’ndregu, ti nica ună perioadă dificilă, cu ună kipită tru şcurtu şi marţu.
Managerlu a Institutului di pneumoftiziologie Marius Nasta ditu Bucureşti, mediclu Beatrice Mahler : “Nă aştiptăm la ună perioadă greauă tră sistemlu di Sănătate. Nu maş tră atea că avem ună rată di vaccinare dipu nghiosu, ñică ama şi aţea că avem mulţă oamiñi cari au lăngori croniţi, cari, ti amărtie, tru aeşti doi añi agiumsiră multu aretcu tru cabinetili a yeaţărloru specialişti tră reevaluări. Ună parti ditu elli ş-alăsară tratamentul şi atumţea vas ă spunu că aestă categorie easti multu ma vulnearabilă tră ună infecţie cu un virus cari s’transmite pi cale respiratorie.”
Avertismentili ligate di gradlu analtu di transmitere a aluştui aduc aminti că, tru toamnă, România triecu pritu nai ma greaua dalgă di infectări cu coronavirus di la nkisita a pandemiillei. După ţi tru veară, cu tuti timbihili fapti a epidimiologilor, restricţiile anti-Covid fură relaxate, iara regulile ţi nica suntu tu practico fură multu pţănu tiñisiti, ahurhita-a toamnăllei adusi recorduri di cazuri diagnosticate, di pacienţă aflaţ tru spitale şi di decese asociate SARS-CoV-2. Tru ţifre, meslu sumedru 2021 nsimnă cama di 400 di ñilli di cazuri năi di COVID-19 şi pisti 10.700 di decese asociate coronavirusului.
Parasolicitarea a instalaţiilor ditu secțiile di lăngori infecțioase dusi şi la doauă accidente traghiţi tru aţelu mesu, di muriră 11 di oamiñi. Cu scupolu ta s’nu s’facă ahtări scenarii dramatiţi, vaccinarea armâne nai ma importantă armă – u spun yeaţărlli și specialiștilli di lumea tută. București, coordonatorlu a campaniei naționale di vaccinare, Yeaturlu Valeriu Gheorghiță, năpoi spuni ti căndăserli pro-imunizari, cundillinda că maş pritu empatie, onestitate și dialog pot s’hibă combătuti dezinformarea, ezitarea, scepticismul și nipistipsearea.
Autor: Corina Cristea
Armânipsearia: Taşcu Lala
